Astanada elektr qýatynyń qunyn 24,43 teńgeden 31,67 teńgege kóterý máselesi talqylanyp jatyr
ASTANA. KAZINFORM – Astana qalasy Tabıǵı monopolııalardy retteý departamentiniń tabıǵı monopolııalar men baǵalardy retteý bóliminiń basshysy Nurlan Qaırat elorda turǵyndary úshin elektr qýatynyń tarıfi 1Kılovat/saǵat úshin 24 teńge 43 tıynnan 31 teńge 67 tıynǵa deıin kóterilýi múmkin ekenin aıtty.
- Qazir departamenttiń qaraýynda «Astana-Aımaqtyq elektr jelilik kompanııasy» aktsıonerlik qoǵamynyń elektr qýatymen jabdyqtaý tarıfi týraly ótinimi jatyr. Shilde aıynda «Astanaenergosbyt» JShS jumysyn toqtatyp, ornyna «Astana- Teplotranzıt» kompanııasy keledi. Ol kezde de «Astana- Teplotranzıt» bizdiń departamentke ótinimmen shyǵady. Jyl aıaǵyna deıin kommýnaldyq salada basqa ótinimder tirkelgen joq, - dedi ol áleýmettik jeli arqyly tikeleı efırde ótken qoǵamdyq qabyldaýda.
Aıtýynsha, kommýnaldyq kompanııa elektrmen jabdyqtaý qunyn jeke tulǵalar úshin qazirgiden 7 teńge 24 tıynǵa qymbattatýdy usynyp otyr.
- Qazirgi tańda ótinim berýshiniń jobasy boıynsha elektr qýatymen jabdyqtaý tarıfin 29 paıyzǵa kóterý usynyldy. Biraq ol áli bekitilgen joq. Departament áli qarap jatyr. Qazirgi tańda «Astanaenergosbyttyń» ortasha tarıfi – 1 KVt/saǵ-qa 24 teńge 43 tıyn. Olar usynyp otyrǵan joba boıynsha osy somany 31 teńge 67 tıynǵa jetkizý usynylǵan, - dedi ol.
Buǵan deıin Astanada sarqyndy sýǵa qatysty tarıf ósýi múmkin ekenin jazǵan edik.