Astanada «Elbesik arýy» qalalyq baıqaýy ótti
ASTANA. Naýryzdyń 13-i. QazAqparat /Gúlmıra Álıakparova/ - Astana qalasyndaǵy «Kórme»-EHRO» ortalyǵynda ótken «Elbesik arýy» baıqaýynda S.Seıfýllın atyndaǵy Qazaq agrotehnıkalyq ýnıversıtetiniń 1-shi kýrs stýdenti jeńimpaz boldy,
dep habarlaıdy QazAqparat.
Birneshe irikteý kezeńnen turǵan «Elbesik arýy» qalalyq baıqaýynyń aqtyq synyna elordalyq mektepter, arnaýly orta jáne joǵary oqý oryndardan barlyǵy 17 arý qatysty.
Baıqaý tórt kezeńnen turdy. Qyzdar aldymen, qazaq estradasynyń jaryq juldyzy Qaraqat Ábdildına tóraıymdyq etken talǵampaz qazylar alqasy men kópshilik kórermenniń aldynda ózderin tanystyryp, kıim úlgilerin kórsetti. Ekinshi saıysta arýlar kórermenderdi án men kúıge bóledi. Al úshinshi baıqaýda olar qazaqtyń oıý-órnekteriniń syzbasyn jasap, olardy mataǵa kestelep pishýi tıis boldy. Sońǵy saıysta boıjetkender ata-babalarymyzdyń salt-dástúrlerin jetik bilý synaǵynan ótti.
Tartysty ótken baıqaýda qazylardyń sheshimimen S.Seıfýllın atyndaǵy Qazaq agrotehnıkalyq ýnıversıtetiniń 1-shi kýrs stýdenti Ǵazıza Ybyraeva kórkine aqyly saı qazaq arýy dep tanylyp, «AGRO-INSRANCE» saqtandyrý kompanııasy taǵaıyndaǵan bas júlde men 1 oryndy ıelendi.
Ǵ.Ybyraeva aldaǵy jaz aılarynda ótetin respýblıkalyq baıqaýǵa joldama aldy.
