Astanada Elbasynyń Joldaýyn túsindirý boıynsha aqparattyq-nasıhat tobynyń otyrysy ótti
ASTANA. 15 aqpan. QazAqparat /Jasulan Amanbaıuly/ - Búgin Astanadaǵy QR Prezıdentiniń mádenıet ortalyǵynda QR Eńbek jáne halyqty áleýmettik qorǵaý mınıstri Gúlshara Ábdihalyqovanyń jetekshiligimen «Bolashaqtyń irgesin birge qalaımyz!» atty Elbasynyń Qazaqstan halqyna Joldaýyn túsindirý boıynsha aqparattyq-nasıhat tobynyń otyrysy ótti.
Elbasy Joldaýynyń maǵynasyn ashyp, mánin túsindirý úshin respýblıka deńgeıinde mınıstrlerdiń, Parlament depýtattarynyń jetekshilikterimen 15-ke tarta aqparattyq-nasıhat toby qurylǵan bolatyn. Atalmysh toptar 15-16 aqpan kúnderi 15-ke tarta otyrys ótkizip, halyqty memleket qolǵa alǵan josparlarmen tanystyrmaq.
Otyrys barysynda QR Eńbek jáne halyqty áleýmettik qorǵaý mınıstri Gúlshara Ábdihalyqova jınalǵan qaýym aldynda Qazaqstannyń 2020 jylǵa deıin halyqty eńbekpen qamtý jańa baǵdarlamasynyń sheńberinde atqarylatyn Úkimettiń áleýmettik saladaǵy mindetterin aıtyp berdi.
Mınıstrdiń atap ótýinshe, baǵdarlama úsh baǵyt boıynsha júzege asyrylatyn bolady. Onyń birinshisi - oqytý arqyly belsendirý ári odan ary jumysqa ornalastyrý jáne áleýmettik qoldaý kórsetý. Ekinshisi - ekonomıkalyq ósimge qaraı baǵdar ustaý arqyly eńbek resýrstarynyń jedeldigin arttyrý. Úshinshisi - aýyldyq jerde kásipkerlikti damytý.
2015 jylǵa qaraı atalǵan baǵdarlamanyń 1,5 mıllıonǵa jýyq adamdy qamtıtyndyǵyn atap ótken ol: «Ony júzege asyrý respýblıkadaǵy kedeıshilik deńgeıin 6 paıyzǵa deıin tómendetýge sonymen qatar, árıne, jumyssyzdyq deńgeıiniń 5,5 paıyzdan asyp ketpeýine múmkindik beredi», - dedi.
Aqparattyq-nasıhat tobynyń otyrysyna QR Mádenıet mınıstrliginiń jaýapty hatshysy Janna Qurmanǵalıeva, Astana qalasy ákiminiń orynbasary Aıda Balaeva, QR Densaýlyq saqtaý vıtse-mınıstri Aıda Qurmanǵalıeva, QR Syrtqy ister mınıstrliginiń, Bilim jáne ǵylym mınıstrliginiń ókilderi, QR Parlamenti depýtattary qatysty.
