Astanada Elbasynyń biregeı shahmat kollektsııasy kórmege qoıyldy
TANA. 20 shilde. QazAqparat /Jasulan Amanbaıuly/ - Búgin - Shahmat oıynynyń halyqaralyq kúnine oraı, Astanada QR Tuńǵysh Prezıdentiniń murajaıynda «Patshalar oıyny» atty kórme ashyldy.
Kórmege 10-ǵa tarta biregeı shahmattar kollektsııasy usynylǵan. Olardyń barlyǵy Elbasy N. Nazarbaevqa Reseı, Belarýs, Úndistan, Qytaı jáne basqa da elderdiń basshylary men resmı delegatsııalary, sonymen birge álem chempıondary, halyqaralyq grossmeısterler Anatolıı Karpov pen Vıshvanatan Anandtyń syıǵa tartqan jádigerleri.
Murajaıdyń qorynda saqtalǵan atalǵan shahmattar jıyntyǵy óziniń biregeıligimen ári qaıtalanbastyǵymen atalmysh ekspozıtsııanyń máni men mártebesin ashyp tur.
Máselen, munda mamont súıeginen jasalǵan shahmat músinshelerin jáne sıantsı dep atalatyn ertedegi Qytaı shahmatynyń úlgisin kórýge bolady.
2001 jyly Ýkraına Prezıdenti L. Kýchmanyń QR Prezıdenti N. Nazarbaevqa tartý etken ýkraın halqynyń Polshaǵa qarsy ult-azattyq soǵysyn beıneleıtin shahmat taqtasyn da osy kórmeden kórýge bolady. Al áıgili álem chempıony A. Karpovtyń tartý etken shahmat taqtasy men músinderi qazaq hany men sarbazdary keıpinde qashalyp, arnaıy tapsyryspen jasalǵan. Sondaı-aq biregeı kórmede Tsın Shıhýandıdiń ataqty tarrakottyq áskerleriniń, vıkıng pen mońǵol áskerleriniń shahmat músinsheleri bar taqtalar da kózge ushyrasady.
Qazaqstannyń 5 dúrkin chempıony, halyqaralyq grossmeıster Dármen Sádýaqasovtyń aıtýynsha, shahmatshynyń óziniń jeke kollektsııasy ázirshe joq kórinedi.
«Biraq men Anatolıı Karpovta óte úlken jeke shahmat kollektsııasynyń bar ekenin bilemin. Onyń qoryndaǵy shahmat taqtaılary álemdegi eń tańdaýly dúnıeler. Onda óte sırek ushyrasatyn mamont súıeginen, baǵaly metaldardan jasalǵan shahmattar bar», - deıdi D. Sádýaqasov.
Sondaı-aq shara barysynda elorda mektepteriniń bastaýysh synyp oqýshylary men qala turǵyndary halyqaralyq grossmeıster Dármen Sádýaqasov pen onyń qaryndasy, álem chempıony Dınara Sádýaqasovamen oıyn seansyn ótkizýge múmkindik aldy. Bir mezgilde 15-ke tarta adammen bolǵan oıyn bir saǵattan astam ýaqytqa jalǵasty. Osylaısha, shahmatqa endi bet bura bastaǵan baldyrǵandar halyqaralyq deńgeıdegi otandastarynan sheberlik tájirıbesin aldy.
