Astanada «Elbasyǵa tilek» kórmesi ashyldy

Sharany Astana qalasy Bilim basqarmasy, «№1 óner mektebi» MKQK jáne ıÝNESKO klýby balalar kórkemóner mektebi birigip uıymdastyrǵan.

«Búgin Astana qalasynyń oqýshylary óz qoldarynan shyqqan qolóner týyndylaryn Prezıdentimiz Nursultan Nazarbaevqa syılyq retinde kórmege qoıyp otyr. Bul jumystardan balalardyń ómirge degen, eline degen, Astanaǵa degen kózqarasyn aınytpaı tanýǵa bolady», - dedi kórmeniń ashylý saltanatynda sóz sóılegen Astana qalasy Bilim basqarmasynyń bastyǵy Ásıma Bımendına.

Baıqaýǵa Astana qalasy bilim berý uıymdary: balabaqsha tárbıelenýshileri, jalpy bilim beretin mektep oqýshylary, tehnıkalyq jáne kásiptik bilim berý mekemeleri stýdentterinen  400-den astam jumys qabyldandy.  Baıqaý erejesine sáıkes jumystar ártúrli tehnıkada oryndaldy, ıaǵnı toqyma materıaldarynan, aǵash jáne metaldan óńdelgen kórkemdik jumystar, músindik, qoldanbaly ónerdiń dástúrli emes túrleri, akvarel boıaýymen kartınalar, kollaj jumystary bar.

Sondaı-aq, Á. Bımendına jumystary úzdik dep tanylǵan balalarǵa dıplomdar men baǵaly syılyqtar tabystady. Atap aıtar bolsaq, balabaqsha tárbıelenýshileri arasynan bas júldege №32 «Baldáýren» balabaqshasynyń búldirshini Klychev Ratmır ıe boldy. 7-13 jas aralyǵyndaǵy oqýshylardan №49 OM oqýshysy Tilektes Erasyl bas júldege laıyq dep tanyldy. 14-17 jastaǵy oqýshylar arasynan №41 OM oqýshysy Ivanıýkova Irına úzdik atandy. Al kolledj stýdentteri arasynan Menedjment jáne bıznes kolledjiniń stýdenti Qoılybaeva Aqtoty bas júlde ıelendi.

Esterińizge sala keteıik, kórmege iriktelip alynǵan úzdik jumystar elimizdiń Tuńǵysh Prezıdenti kúni merekesine oraı 15-20 qarasha aralyǵynda ótkizilgen baıqaý nátıjesinde belgili boldy.

Bul erekshe baıqaýdyń maqsaty - oqýshylardyń  Otanyna, Elbasyǵa degen súıispenshilikterin oıatý, balalar shyǵarmashylyqtaryn  damyta otyryp ony qoldaý jáne tanytý,  jalpy jáne kórkem mádenıetti kóterý bolyp tabylady.