Astanada «Elbasyǵa tilek» kórmesi ashylady
ASTANA. 20 qarasha. QazAqparat - Búgin elordanyń jańa Oqýshylar saraıynda «Elbasyǵa tilek» І balalar shyǵarmashylyǵynyń qalalyq baıqaýyna arnalǵan kórme ótedi. Oǵan ekspozıtsııaǵa qatysýshylardyń eń úzdik jumystary qoıylady. Bul týraly Astana qalasy ákimdiginiń resmı saıtynan habarlady.
Baıqaýǵa Astana qalasy bilim berý uıymdary: balabaqsha tárbıelenýshileri, jalpy bilim beretin mektep oqýshylary, tehnıkalyq jáne kásiptik bilim berý mekemeleri stýdentterinen 400-den astam jumys qabyldandy. Baıqaý erejesine sáıkes jumystar ártúrli tehnıkada oryndaldy, ıaǵnı, toqyma materıaldarynan, aǵash jáne metalldan óńdelgen kórkemdik jumystar, músindik, qoldanbaly ónerdiń dástúrli emes túrleri, akvarel boıaýymen kartınalar, kollaj jumystary bar.
Eske salaıyq, elimizdiń Tuńǵysh Prezıdenti kúni merekesine arnalǵan is-sharalar aıasynda 1 qarashadan bastap qalalyq І «Elbasyǵa tilek» balalar shyǵarmashylyǵy baıqaýy ótkizilýde.
Bul erekshe baıqaýdyń maqsaty - oqýshylardyń Otanyna, Elbasyǵa degen súıispenshilikterin oıatý, balalar shyǵarmashylyqtaryn damyta otyryp ony qoldaý jáne tanytý, jalpy jáne kórkem mádenıetti kóterý bolyp tabylady.
