Astanada Elbasy júldesi úshin «Qazaqstan Barysy» respýblıkalyq týrnıri ótedi

4 aqpan kúni «Saryarqa» respýblıkalyq velotreginiń májilis zalynda qazaq kúresinen Ult Kóshbasshysy - Qazaqstan Respýblıkasynyń Prezıdenti Nursultan Ábishuly Nazarbaevtyń júldesi úshin «Qazaqstan Barysy» respýblıkalyq týrnıriniń úshinshi maýsymynyń ashylýyna oraı baspasóz máslıhaty ótedi.

Bul týraly «Qazaqstan Barysy» qazaq kúresin damytý qorynyń baspasóz qyzmeti habarlady.

Baspasóz máslıhatyna QR Sport jáne dene shynyqtyrý isteri agenttigi, «Nur Otan» Halyqtyq Demokratııalyq partııasy, «Samuryq-Qazyna» Ulttyq ál-aýqat qory jáne «Qazaqstan Barysy» qazaq kúresin damytý qorynyń basshylary qatysady.

Maýsym aıynda qazaq kúresinen ótetin «Qazaqstan barysy» respýblıkalyq týrnıri osymen úshinshi márte uıymdastyrylǵaly otyr. Іrikteý syndary 1 aqpannan 10 mamyrǵa deıin elimizdiń barlyq aımaǵynda júrgizilip, úzdik balýandar Astana tórinde ótetin fınalǵa joldama alady.