Astanada «Elbasy jáne Túrkistan» kórmesi ashyldy

ASTANA. QazAqparat -  Búgin Astana qalasynyń kontsert zalynda  Qazaqstan Respýblıkasy Tuńǵysh Prezıdenti kúnine oraı «Elbasy jáne Túrkistan» kórmesi ashyldy. QR Mádenıet jáne sport mınıstrligi men «Áziret Sultan» memlekettik tarıhı-mádenı qoryq-mýzeıiniń uıymdastyrýymen ashylǵan kórmede 60-tan asa jádiger qoıylǵan, dep habarlaıdy QazAqparat tilshisi.

Kórmeniń birinshi bóliminde Elbasy N.Á.Nazarbaevtyń 1985 jyly Qazaq SSR Mınıstrler kabınetiniń basshysy, egemendi, táýelsiz Qazaqstannyń Tuńǵysh Prezıdenti tusyndaǵy baýyrlas Túrkııa Respýblıkasynyń prezıdentteri Turǵyt Ozal, Súleımen Demırel, Ahmet Sezar, Abdýlla Gúl, Redjep Taıyp Erdoǵanmen túsken sýretteri usynylǵan.

Sondaı-aq, ekspozıtsııada aǵymdaǵy jylǵy Túrkistandaǵy resmı saparlarynan syr shertetin fotosýretterin tamashalaýǵa bolady. Ekinshi bólim áýlıelerdiń Sultany atanǵan Qoja Ahmet ıAsaýı murasyna   arnalady. Onda Qoja Ahmet ıAsaýıdiń artynda qalǵan baǵa jetpes muralary HVІІІ ǵasyrǵa tán «Dıýanı hıkmet» kitabynyń qoljazba jáne baspa nusqalary, HІH ǵasyrda qaıta kóshirilgen «Rısollá dár adabı tarıqat», «Nasabnama» shejiresi bar. Budan bólek, uly tulǵanyń shákirtteri S.Baqyrǵanıdiń «Dıýan», Sheıh Hýdaıdad Tash-Mýhammed ál-Býharıdiń «Býstan ýl Mýhıbbınniń» túrki tilinde jazylǵan qoljazba eńbegi, Á.Naýaıdiń «Ǵazaldary», Sofy Allaıardyń «Mýslık al-Mýttakın», «Áýlıeniń ósıetteri», Qoja Hafızdiń «Dıýany», Imam Maǵrýdıdiń «Qıssalary», Áýlıe Bıdeldiń «Dıýan» eńbekteri ornalastyrylǵan.   

   Kórmeniń úshinshi bólimi Túrkistan óńirindegi kıeli oryndar men tarıhı eskertkishter jaıyndaǵy fotosýretterge arnalǵan.