Astanada «Elbasy jáne Táýelsizdik» atty dóńgelek ústel otyrysy ótti
Atalmysh shara táýelsiz memlekettiń qalyptasýy men damý tarıhynyń ózekti máselelerin, QR Tuńǵysh Prezıdenti - Elbasy Nursultan Nazarbaevtyń el memlekettiligin qurýdaǵy, táýelsiz Qazaqstannyń damýyndaǵy, qoǵamnyń demokratııalanýy men prezıdenttik ınstıtýttyń nyǵaıýyndaǵy tarıhı rólin, halyqty biriktirý úderisine, beıbitshilik pen kelisimdi nyǵaıtýǵa, sol sııaqty eldiń syrtqy saıası strategııasyn aıqyndaýǵa qosqan úlesin talqylaý maqsatynda uıymdastyryldy.
Onyń jumysyna QR Prezıdenti Ákimshiliginiń, QR Prezıdenti janyndaǵy Memlekettik basqarý akademııasynyń, QR Ortalyq saılaý komıssııasynyń ókilderi, QR Parlamentiniń depýtattary, ǵalymdar, zertteýshiler qatysty.
«Búgingi dóńgelek ústel 1 jeltoqsanda elimiz QR Tuńǵysh Prezıdenti kúni memlekettik merekesin toılaý kezeńinde ótip jatqany sımvolıkalyq mánge ıe. Bizdiń memleketimiz Tuńǵysh Prezıdentin saılaǵannan keıin, Qazaqstan Respýblıkasy degen jańa ataýy men óz Táýelsizdigin aldy. Sondyqtan qazaqstandyqtardyń sanasynda el Táýelsizdigi, prezıdent ınstıtýty men QR Tuńǵysh Prezıdenti egiz uǵym bolyp qalyptasýy - zańdylyq», - deıdi QR Prezıdenti Keńsesi basshysynyń orynbasary Baqytjan Temirbolat.
«Búgin biz Táýelsizdik jyldarynda jetkizgen jetistikterimizdi jáne bul úderisterdegi Ult Kóshbasshysynyń rólin talqylaımyz. Memleket basshysynyń tulǵasy bizdiń egemendi tarıhymyzdyń barlyq oqıǵalarynda óz izin qaldyrǵany sózsiz», - dep atap ótti ol.
