Astanada «Elbasy jáne Qazaq memlekettigi» kitabynyń tanystyrylymy ótti (FOTO)
ASTANA. QazAqparat - Búgin Astanadaǵy QR Ulttyq akademııalyq kitaphanasynda QR Parlamenti Májilisiniń depýtaty, Qazaqstan Respýblıkasy Prezıdentiniń janyndaǵy Adam quqyqtary jónindegi komıssııanyń tóraǵasy Qýanysh Sultanovtyń «Elbasy jáne Qazaq memlekettigi» kitabynyń tanystyrylymy boldy.
Avtordyń bul kitabynda Memleket basshysy Nursultan Nazarbaevtyń táýelsiz Qazaqstannyń qalyptasýy, qarqyndy damýy jáne halyqaralyq bedeliniń nyǵaıýy jolyndaǵy san qyrly qyzmeti beınelengen.
Qazaqstan halqy Assambleıasy ǵylymı-saraptamalyq keńesi tanystyrylym aıasynda belgili qoǵam qaıratkeri, saıası ǵylymdardyń doktory, professor Q.S.Sultanovtyń osynaý biregeı kitabynyń jarııa retsenzııasyn uıymdastyryp otyr. Basylym sandyq nusqada ǵalamtor jelisine usynylady.
Aıta keteıik, búgingi tanystyrylymdy Qazaqstan halqy Assambleıasy, QR Prezıdentiniń janyndaǵy «Qoǵamdyq kelisim» RMM, QHA ǵylymı-saraptamalyq keńesi uıymdastyrdy.
Tanystyrylymǵa Qazaqstan halqy Assambleıasy Tóraǵasynyń orynbasary, Hatshylyq meńgerýshisi Eraly Toǵjanov, QHA keńesiniń músheleri, QR Parlamenti Májilisiniń depýtattary, ǵylymı-saraptamalyq keńestiń qyzmetkerleri, memlekettik organdardyń, joǵary oqý oryndarynyń, ǵylymı jáne shyǵarmashyl zııaly qaýymnyń ókilderi, jastar, Ulttyq akademııalyq kitaphananyń oqyrmandary qatysty.
