Astanada «Elbasy. Mańǵystaý» atty kitaptyń tusaýy kesildi
1-shilde «Ulttyq dombyra» kúni merekesine Abyl Taraquly atyndaǵy ult aspaptar orkestri Qazaq eli alańyn áýelegen ánmen kómkerip, kúmbirlegen kúıge bóledi.
Mereke qarsańynda «Óńirlerdiń Astanaǵa tartýy» baǵdarlamasy aıasynda Mańǵystaý oblysy «Dostyq úıin» syıǵa tartyp, Astananyń 20 jyldyǵyna erekshe tartý jasaǵan bolatyn.
«Astana - jalpyulttyq birlik pen kelisim qalasy», - degen Ult Kóshbasshysynyń sózin mańǵystaýlyqtar syılaǵan mańǵaz ǵımarat aıshyqtap turǵandaı. Dostyq úıine arnaıy baryp, sáýlettik erekesheligimen tanysyp, ishin aralaǵan Memleket basshysy Nursultan Nazarbaev elordanyń etnomádenı ortalyqtarynyń ókilderimen jáne Mańǵystaý oblysynyń kórnekti qoǵam qaıratkerlerimen áńgimelesti.
«Elimizdiń barlyq óńirinde Dostyq úıleri bar. Onda oblystardyń etnomádenı birlestikteri jumys isteıdi. Endi bas qalanyń da Dostyq úıi bolady. Sizderdi osy aıtýly oqıǵamen quttyqtaımyn!», - dedi Nursultan Nazarbaev.
Mańǵystaý oblysynyń ákimi E.Toǵjanov Memleket basshysyna Dostyq úıiniń eskızdik jobasyn tanystyrdy. Onda kitaphana, mýzeı, halyqtyq qoldanbaly óner sheberhanalary, konferents-zal jáne tilderdi oqytý ortalyǵy úshin arnaıy oryndar qarastyrylǵan. Ǵımarattyń jalpy aýmaǵy - 4 myń sharshy metr.
Sondaı-aq kezdesý barysynda mańǵystaýlyq qoǵam qaıratkerleri Memleket basshysy N.Á.Nazarbaevqa «Elbasy. Mańǵystaý» atty jańa kitapty tartý etti. 1 myń danamen shyqqan 5 bólimnen turatyn tarıhı hronologııalyq kitap - Elbasynyń qamqorlyǵymen Mańǵystaý ólkesiniń oblys mártebesine qaıta ıe bolýy, táýelsizdik jyldaryndaǵy oblystyń gúldenýi jáne kıeli túbektiń ótken tarıhy jaıly syr shertedi.
Bul pýblıtsıstıkalyq povest - Qazaqstan Respýblıkasynyń Tuńǵysh Prezıdenti - Elbasy kitaphanasy men Qazaqstan Respýblıkasynyń Tuńǵysh Prezıdenti Qory uıymdastyrǵan «Qazaqstan Táýelsizdigi jáne Elbasy» respýblıkalyq konkýrsynda júldeli ekinshi orynǵa ıe boldy.
Mańǵystaýlyq ónerpazdar usynǵan mádenı kesh búgin «Astana» kontsert zalynda jalǵasyn tapty. «Jańǵyrǵan Mańǵystaýdan - jasampaz Astanaǵa» atty óner sheberleriniń merekelik kontserti qoıyldy. Onda Abyl Taraquly atyndaǵy qazaq orkestri, «Jorǵa» bı ansambli, mádenıet salasynyń úzdikteri Asqar, Asanáli Kósherovter jáne «Men Qazaqpyn!» megajobasynyń bas júldegeri Ospan Qulsymaq syndy birqatar óner maıtalmandary óner kórsetti. Sondaı- aq elordalyq jurtshylyqqa «Tabıǵaty tańǵajaıyp - muraly mańǵystaý» oblystyq tarıhı-ólketaný mýzeıiniń kórmesi usynyldy.
Shara barysynda sóz alǵan Mańǵystaý oblysynyń ákimi Eraly Toǵjanov: «Prezıdentimiz Nursultan Ábishuly Nazarbaev atap ótkendeı: «Jańa Astana - táýelsiz Qazaqstan úshin jarqyn keleshektiń nyshany», «Astana - Otanymyzdyń júregi, táýelsizdigimizdiń tiregi!», - dedi ol.
Elbasynyń saıası kóregendigimen bas qala atanǵan, elimizdiń boıtumaryna aınalǵan Astana turaqty damýdyń, ósý men órkendeýdiń dańǵyl jolyna tústi. Búginde kózdi ashyp - jumǵansha mıllıonnan astam turǵyny bar bolashaqqa boı túzegen arman qalaǵa aınaldy.
Olaı bolsa, Astana - egemendigimiz ben táýelsizdigimizdiń sımvoly, Otanymyzdyń tiregi men maqtanyshy. Mańǵystaý jurty Elbasymyzdyń mán-mańyzy zor baǵdarlamalaryna árqashan qoldaý bildirip, elordamyzdy, elimizdi kórkeıte túsýge atsalysyp, úles qosýdy úlken abyroı, mindet sanaıdy.
4 shildede Astanada «Etno aýyl» ulttyq mádenı kesheni men «Qazanat» ıppodromynda Mańǵystaý oblysy shyǵarmashylyq ujymdarynyń kontserti ótedi.
Sondaı-aq, Qazaq orkestrleriniń «Serper» V Respýblıkalyq festıvali aıasynda Abyl Taraquly atyndaǵy ult aspaptar orkestriniń kontserttik baǵdarlamasy elordalyq óner súıer qaýymnyń nazaryna usynylmaq.
