Astanada «Elbasy» ániniń tusaýy kesiledi
ASTANA. QazAqparat - 30 qarashada «Astana Opera» teatrynyń Kameralyq zalynda belgili qazaqstandyq kompozıtorlar - Serikjan Ábdinurovtyń «Otan» jáne Álibı Ábdinurovtyń Qazaqstan Respýblıkasynyń Tuńǵysh Prezıdentine arnaǵan «Elbasy» ánderiniń tusaýy kesiledi, dep habarlaıdy atalǵan teatrdyń baspasóz qyzmeti.
Qazaqstan Respýblıkasynyń Tuńǵysh Prezıdenti kúnine jáne QR Táýelsizdiginiń 25 jyldyǵyna arnalǵan «Otan, saǵan arnaımyz» kontsertiniń baǵdarlamasynda, halyq súıip tyńdaıtyn otandyq avtorlardyń shyǵarmalary da usynylmaqshy. Keshte E. Brýsılovskıı, Ǵ. Jubanova, E. Rahmadıev, N. Tilendıev, S. Erkimbekov, K. Kúmisbekov, S. Báıterekov, K. Ybyraev jáne taǵy basqa avtorlardyń ánderi, romanstary, aspaptyq kompozıtsııalary oryndalady. Halyq aspabyn unatatyndar úshin qobyzda oryndalatyn Dına Nurpeıisovanyń «Naýaı» kúıi tamasha tartý bolady. Sondaı-aq, tyńdarman nazaryna kópultty Qazaqstan halqynyń ómirge, týǵan elge degen súıispenshiligi jaıly shyǵarmalary usynylady, olardyń ishinde G. Svırıdovtyń «O Otan, baqytty da erekshe sát», S. Týlıkovtyń «Otan» jáne V. Basnerdiń «Qalqan jáne semser» kınofılminen «Otan neden bastalady» áni jáne taǵy basqalary bar.
Mýzyka keshinde Aızada Qaponova, Saltanat Muratbekova, Beıimbet Tańaryqov, Eskendir Ábjanov, Mádına Islamova, Roza Núrkeı, Elena Ganja, Erulan Kamel, Konstantın Strıgın, Gúlnur Ermanova, Aıda Qurmanaeva, Ómirjan Qadirov, Ermek Berimjanov syndy daryndy vokalshylar, sondaı-aq, «Astana Opera» Sımfonııalyq orkestriniń sheber mýzykanttary men Qazaq ulttyq óner ýnıversıtetiniń «Eligaı» balalar hory (kórkemdik jetekshisi jáne dırıjeri E. Sansyzbaev) óner kórsetedi.
Fortepıano partııasynda - halyqaralyq baıqaýlardyń jeńimpazdary Raýshan Beskempirova, Gaýhar Tasbergenova, Janar Ahmetova. Júrgizýshi - mýzykatanýshy Sáýle Máýletova, óleń oqıtyn - Eltaı Mustanov.
