Astanada «El ishi - óner kenishi» baıqaýynda eldiń túkpir-túkpirinen kelgen birtýma ártister marapattaldy
ASTANA. 30 qazan. QazAqparat - Búgin Astana qalasynyń «Kongress Holl» saraıynda «El ishi - óner kenishi» atty respýblıkalyq televızııalyq halyq shyǵarmashylyǵy baıqaýynyń gala-kontserti ótti.
Baıqaýdyń aqtyq synyna elimizdiń barlyq aımaqtarynyń jáne Almaty, Astana qalalarynyń irikteý kezeńderinen jeńip shyqqan sheberler men úzdik ujymdar qatysty.
Baıqaýdyń saltanatty bóliginde sóz alǵan QR Mádenıet jáne aqparat mınıstri Darhan Myńbaı, elimizdiń jer-jerlerinde birtýma daryndy da tamasha ónerpazdar kóp ekendigine nazar aýdardy.
«Búgingi «El ishi - óner kenishi» konkýrsynyń basty maqsaty - solardyń barlyǵyn halyqtyń aldyna shyǵarý, olar qashan jetilip, aldymyzǵa keledi dep emes, ózimiz izdep, qol ushyn berý, qolǵabys jasaý boldy», - dedi mınıstr.
«Bul túptep kelgende qazaq ónerin, qazaq mádenıetin qoldaý bolyp tabylady. Búgingi Astanadaǵy qorytyndy keshke 63-ke jýyq azamat keldi. Bunyń barlyǵyna járdem bergen oblystyq mádenıet basqarmalarynyń bastyqtaryna jáne oblys ákimdikterine rahmetimdi aıtamyn», - dep túıindedi sózin D. Myńbaı.
Mınıstrdiń aıtýynsha, halyq óneriniń qaınar kózi, káýsar bulaǵy - el ishinen bastaý alatyndyqtan, atalmysh baıqaýdyń mańyzy jyl ótken saıyn artyp, qanaty qataıa bermek. Halyq óneri men rýhanı murasyn búginge jetkizip, nasıhattap júrgen týma talant ıeleri ary qaraı da qoldaýǵa ıe bola beredi.
