Astanada EQYU sammıti kúnderi jumys jasaıtyn jýrnalısterge arnalǵan Baspasóz ortalyǵy ashyldy
ANA. 25 qarasha. QazAqparat /Gúlmıra Álıakparova/ - Búgin tańerteń Astanadaǵy «Shabyt» óner úıinde 1,2 jeltoqsan kúnderi ótetin EQYU sammıtin aqparattandyratyn otandyq jáne shet el jýrnalısterine arnalǵan baspasóz ortalyǵy ashyldy.
«Shabyt» baspasóz ortalyǵynyń 1,2-qabattarynda baspasóz tilshilerine arnalǵan 1 myńnan astam jumys orny jabdyqtalǵan. Onda jeke kompıýterler (400 oryn), qalalyq jáne halyqaralyq baılanystarǵa qosylǵan telefondar, lazerli prınterler, skanerler men kóshirme apparattary ornatylǵan. Sonymen birge, jeke noýtbýktarmen jumys jasaýǵa bolatyn joǵary jyldamdyqty ınternet jelisi tartylǵan bólmeler bar.
Birinshi qabatta sondaı-aq, tele jáne radıo jýrnalıster úshin montajdy bólmeler bar. Onda Sammıttiń tikeleı kórsetilimi monıtorlarǵa berilip, olardy beıne taspalarǵa túsirip alý múmkindigi jasalǵan. Sammıt otyrysy barysynda jasalatyn fotosýretterdi de shuǵyl túrde kóshirip alý jaǵdaılary qarastyrylǵan.
Baspasóz máslıhattaryn ótkizýge arnalǵan birneshe zal jáne ashanalar bar. Baspasóz ortalyǵy 30 qarashadan bastap táýlik boıy jumys jasaıdy.
Eske salaıyq, EQYU-ǵa múshe elder basshylarynyń Sammıtine 1 myńnan astam shet el jáne otandyq jýrnalıst qatysady dep kútilýde. Sammıt jumysy EQYU-nyń resmı alty tildi (aǵylshyn, nemis, ıspan, frantsýz, ıtalıan jáne orys) qamtıtyn bolady.
