Astanada EKU protsedýrasyna MÁMS-ten 2 mlrd teńgeden asa qarjy bólindi

ASTANA. KAZINFORM – Áleýmettik medıtsınalyq saqtandyrý qory elordalyq fılıalynyń málimetinshe, 2023 jyly MÁMS qarajatynan EKU protsedýralary úshin 2069 áıel adamǵa 2,3 mlrd teńge bólindi, onyń ishinde Astana qalasynan 554 kvota qarastyryldy. 

Aıta ketý kerek, 2023 jyly Astana qalasy boıynsha 15 jeńildik sanatyna kiretin júkti áıelder dárigerlerdiń baqylaýyna baılanysty 2 mln qyzmet aldy. Bul zerthanalyq jáne dıagnostıkalyq zertteýler, skrınıngter jáne basqa da qajetti medıtsınalyq qyzmetter, olardyń jalpy qarjylandyrýy MÁMS qarajatynan 3,3 mlrd teńgeni qurady. 

Bul rette akýsherlik beıindegi táýlik boıy jumys isteıtin statsıonarlarda 43 myń astanalyqtyń emdelýine 6,8 mlrd teńge qarastyryldy. Bala kóterýge qabiletti jastaǵy 831 áıel quny 1,68 mln teńge bolatyn temir tapshylyǵy anemııasyn emdeýge arnalǵan preparattardy aldy. 

Sonymen qatar 2024 jyly MÁMS boıynsha uryqtyń týa bitken aqaýlarynyń aldyn alý úshin dári-dármekterdi qarjylandyrýǵa 9,25 mln teńge qarastyrylǵan.

«Ýaqtyly skrınıng – ana men balanyń densaýlyǵynyń kepili. Júkti áıelder MÁMS sheńberinde 1-shi, 2-shi, 3-shi trımestrde prenetaldy skrınıngterden ótýi múmkin. Al júkti áıelderdi, sondaı-aq joǵary táýekel tobyndaǵy júkti áıelderdi baqylaý bólimshesinde MÁMS engizýdiń arqasynda tekserý tizbesi keńeıtildi. Naýqas úshin munyń bári tegin bolady», - dep túsindirdi Astana qalasy № 2 kópsalaly aýrýhanasy dırektorynyń ambýlatorııalyq qyzmet jónindegi orynbasary, joǵary sanatty akýsher-gınekolog Sáýle Ibraeva.