Astanada EKSPO-2017 kórmesine qatysýshy memleketterdiń músinderi jasaldy
ASTANA. QazAqparat - Astanada EKSPO-2017 kórmesine qatysýshy memleketterdiń músinderi qoıyldy. Salmaǵy 130 kılogrammdyq shyny plastıkten jasalǵan eki metrlik 84 konstrýktsııa Nurjol jeleginiń basyndaǵy alańda shahmattyq tártipte ornalasqan. Músinder ekspozıtsııasy AstanaArtFest qazirgi zamanǵy óner festıvali aıasynda ótip jatyr, dep habarlady elordalyq mádenıet basqarmasy.
Músinder ár eldiń stılinde jáne taqyrybyna saı ázirlengen. Tanys peızajdar, memlekettik rámizderdiń fragmentteri, ekzotıkalyq janýarlar, sáýlettik eskertkishter, ulttyq oıý-órnekter, memlekettiń geografııalyq kartalarynyń keskini - osynyń barlyǵyn pishinderdiń betinen kórýge bolady.
Bul «Qulanshy» qazirgi zamanǵy óner ortalyǵynyń jetekshiligimen elimizdiń jas sýretshileriniń óz qolymen jasaǵan týyndylar. Eskızderdi jasaýǵa jáne ıdeıany júzege asyrýǵa avtorlar bir aıdan astam ýaqyt jumsady. Sýretshiler Ekspo-adamdar dep atap ketken músinderdiń qolynda úlken shar bar - shyǵarmashylyq turǵydan bul bizdiń álemniń allegorııasy ispetti, ol álem ár adamnyń alaqanynda degendi bildiredi.
