Astanada eks-vıtse-mınıstr Nurjan Áltaevqa qatysty sot otyrysy ótip jatyr

Astana qalasynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti búgin, 31 qazanda Nurjan Áltaevqa (eks-vıtse-mınıstr) qatysty is boıynsha aldyn ala tyńdalym bastalǵanyn málimdedi, dep habarlaıdy Kazinform. 

Oǵan asa iri mólsherde aqsha túrinde para aldy degen aıyp taǵyldy (QK 366-babynyń 4-bóligi).

N.Áltaev 2018 jyldyń aqpanynan 2020 jyldyń shildesine deıin «Atameken» UKP múddeleri úshin tıimdi resmı sheshim qabyldaýǵa yqpaldasyp, deldal arqyly A.Myrzahmetovten para retinde jalpy somasy 50 mln teńgeden astam (115 myń AQSh dollary jáne 8 mln 150 myń teńge) aqshalaı qarajat aldy dep aıyptalǵan.

Qylmystyq is 15 tomnan turady, is boıynsha 18 kýáger ótken.

Eske sala keteıik, 7 maýsymda Májilistiń eks-depýtaty Nurjan Áltaev para aldy degen kúdikpen ustaldy. Bul aqparatty Sybaılas jemqorlyqqa qarsy is-qımyl agenttigi rastady.

Keıinirek Antıkor Nurjan Áltaevtyń Abylaı Myrzahmetovten aı saıyn 5 myń dollar para alyp otyrǵanyn habarlady.

«Nurjan Áltaev 2018-2019 jyldar aralyǵynda QR Eńbek jáne halyqty áleýmettik qorǵaý vıtse-mınıstri bola tura, júıeli túrde «Atameken» ulttyq kásipkerler palatasynyń basqarma tóraǵasy A.I. Myrzahmetovten para retinde aı saıyn 5 000 AQSh dollary mólsherinde aqsha qarajatyn alyp otyrdy dep kúdiktenedi. Keıinnen Áltaev 2019-2020 jyldar aralyǵynda QR Parlamenti Májilisiniń depýtaty laýazymyn atqara otyryp, Myrzahmetovten para alý boıynsha óziniń sybaılas jemqorlyq qyzmetin jalǵastyrdy. Jalpy alǵanda, ol para retinde 135 000 AQSh dollaryn aldy. Bul asa iri kólem bolyp sanalady», - dep habarlady Antıkor.