Astanada ekonomıkany oqytý máseleleri talqylandy
ASTANA. 15 mamyr. QazAqparat - Elimizdiń jetekshi ekonomıst-ǵalymdary men ekonomıka pánderiniń oqytýshylary jaqynda elordadaǵy «Turan-Astana» ýnıversıtetinde oqý oryndarynda ekonomıkany oqytý máselelerin talqylady.
«Qazaqstannyń joǵary bilim salasyndaǵy teorııalyq jáne qoldanbaly ekonomıka: qazirgi ýaqytta jáne bolashaqta neni jáne qalaı oqytý kerek?» atty taqyrypta ótken bul semınar-keńeske Aqtóbe, Almaty, Qaraǵandy jáne Astana qalalaryndaǵy JOO-lardyń jetekshi mamandary men qyzmetkerleri qatysty.
Talqylaýǵa kelesi suraqtar shyǵaryldy: qazirgi ekonomıkalyq ǵylymnyń jalpyteorııalyq jáne jeketeorııalyq qurylymy; qoldanbaly ekonomıkanyń qurylymy: fýnktsıonaldyq, salalyq, óńirlik, quraldyq, pánaralyq ekonomıkalyq pánderi, QR ekonomıkalyq bilim salasyndaǵy memlekettik standart jáne akademııalyq erkindik; teorııalyq jáne qoldanbaly ekonomıka boıynsha oqý josparlarynyń, baǵdarlamalarynyń, ádebıetiniń sapasy; ekonomıkalyq pánderdi oqý jáne oqytý ádistemesi men tehnologııa máseleleri jáne olardy sheshý joldary.
Semınar-keńesti «Turan-Astana» ýnıversıteti, M. V. Lomonosov atyndaǵy Máskeý memlekettik ýnıversıtetiniń janyndaǵy qoǵamdyq ǵylymdar ortalyǵynyń Qazaqstandyq ókildigi uıymdastyrdy.
«Turan» bilim berý korporatsııasynyń vıtse-prezıdenti, e.ǵ.d., professor, Reseı Sharýashylyq fılosofııasy akademııasynyń akademıgi Oraq Álıev semınar-keńes taqyrybynyń ózektiligi men túıtkildigi týraly baıandama jasap, qatysýshylarǵa TMD jáne Baltyq memleketteriniń Halyqaralyq saıası-ekonomıkalyq qaýymdastyǵy týraly aqparat berdi.
Onyń aıtýynsha, TMD jáne Baltyq memleketteriniń mamandary Qazaqstandaǵy ekonomıka ǵylymynyń qaryshtap damýyn moıyndap otyr. Otandyq ǵalymdarymyz ásirese teorııalyq máseleler boıynsha oq boıy alda keledi.
