Astanada ekologııalyq jobalar kórmesi men festıval uıymdastyrylady
ASTANA. KAZINFORM — Astana kúni qarsańynda, 2 shilde kúni I.Panfılov kóshesi men Táýelsizdik dańǵylynyń qıylysyndaǵy Beıbitshilik jáne kelisim saıabaǵynda «TAZA FEST ASTANA» ekologııalyq festıvali ótedi, dep habarlaıdy qala ákimdiginiń resmı saıty.
Festıval elorda turǵyndary men qonaqtaryna arnalǵan. Іs-shara aıasynda ekologııalyq bastamalar, qoǵamdyq dıalog alańdary, tanymdyq kórmeler men mádenı baǵdarlama bir arnaǵa toǵysady.
Festıval aıasynda kologııalyq maketter men ónertabystar kórme-baıqaýy uıymdastyrylady. Qatysýshylar ekologııalyq jobalaryn, robot úlgilerin, «jasyl qala» maketterin, sý men aýany tazartý júıelerin jáne qorshaǵan ortany qorǵaýǵa baǵyttalǵan ózge de ázirlemelerin tanystyrady.
Sol sııaqty ekomarket pen ekologııalyq ónimder kórmesi ótedi. Munda kelýshiler ekologııalyq jaýapty tutyný mádenıetin nasıhattaıtyn ónimdermen tanysa alady.
«Marvınniń» qoldaýymen otbasylyq oıyn-saýyq aımaǵy jumys isteıdi. Baǵdarlamada kitap kórmesi, LEGO qurastyrǵyshtary, ınteraktıvti tır, ústel oıyndary, sýret salýǵa arnalǵan shyǵarmashylyq aımaq jáne demalys buryshy qarastyrylǵan.
«Zań men tártip — esirtkige jol joq!» aqparattyq-profılaktıkalyq alańy uıymdastyrylady. Onda kınologııalyq qyzmettiń jumysy men robot-ıttiń múmkindikteri kórsetilip, taqyryptyq kórme usynylady, aqparattyq materıaldar taratylyp, jastarmen profılaktıkalyq kezdesýler ótedi.
«Jastar jáne qala» dıalog alańy ótedi. Onyń basty is-sharasy — aýdan ákimi men belsendi jastarmen kezdesýi. Ashyq pikirtalas barysynda qatysýshylar ekologııa, qalalyq ortany damytý jáne jastar bastamalaryn júzege asyrý máselelerin talqylaıdy.
Festıvaldiń qorytyndysy jandy daýystaǵy kontserttik baǵdarlamamen túıindeledi.
Aıta keteıik, is-shara saǵat 11:00–de bastalady. Kirý — tegin.
Budan buryn Astana kúni qarsańynda SARYARQA RUN jappaı júgirý jarysy ótetinin jazǵan edik.
