Astanada ekologııalyq standartqa saı emes júk kólikterin elge zańsyz ákelgen qylmystyq top áshkerelendi
ASTANA. KAZINFORM – Qarjylyq monıtorıng agenttiginiń (QMA) Astana qalasy boıynsha departamenti Bas kólik prokýratýrasynyń úılestirýimen ekologııalyq talaptarǵa sáıkes kelmeıtin avtokólik quraldaryn el aýmaǵyna zańsyz ımporttaý faktisi boıynsha júrgizilgen tergeý amaldaryn aıaqtady.
Tergeý barysynda bir top tulǵanyń óz baqylaýyndaǵy jaýapkershiligi shekteýli seriktestikter (JShS) arqyly Qazaqstanǵa «Evro-2» ekologııalyq klasyna jatatyn FAW markaly júk kólikterin zańsyz ákelýdi uıymdastyrǵany anyqtaldy. Bul áreketter elde «Evro-4» standartynan tómen tehnıkany ımporttaýǵa zańmen tyıym salynǵanyna qaramastan jasalǵan.
Arnaıy tehnıka Qytaı Halyq Respýblıkasynan syrtqy ekonomıkalyq kelisimsharttar negizinde jetkizilip, kedendik rásimdeýden ótkizý kezinde jalǵan málimetter paıdalanylǵan. Kúdiktiler kólik quraldarynyń qaýipsizdik sertıfıkattaryn (SBKTS) qoldan jasap, qujattarǵa aýyr júk kólikteriniń ekologııalyq klasy joǵary «Evro-5» standartyna saı degen jalǵan aqparat engizgen.
Osy qylmystyq shemanyń nátıjesinde Qazaqstanǵa jalpy kedendik quny 284 mıllıon teńgeden asatyn 20 birlik arnaıy tehnıka zańsyz kirgizilgen. Keıinnen bul kólikter ózara baılanysy bar kompanııalar jelisi arqyly qaıta satylyp, memlekettik satyp alý kelisimsharttary aıasynda mekemelerge 600 mıllıon teńgeden astam somaǵa jetkizilgen.
Qazirgi tańda sot sanktsııasymen kúdiktilerge tıesili 9 avtokólik pen bir páter hattaldy. Kylmystyq toptyń bir múshesi qamaýǵa alyndy, al onyń eki sybaılasyna qatysty eshqaıda ketpeý týraly bultartpaý sharasy qoldanyldy. Qylmystyq-protsestik kodekstiń 201-babyna sáıkes, tergeýdiń ózge málimetteri jarııa etýge jatpaıdy.
Aıta ketý kerek, ekologııalyq talaptarǵa sáıkes kelmeıtin tehnıkalardy paıdalaný qorshaǵan ortaǵa eleýli nuqsan keltiredi. «Evro-2» klasyndaǵy júk kólikteri zamanaýı «Evro-4» jáne «Evro-5» standarttarymen salystyrǵanda atmosferaǵa zııandy zattardy eselep kóp bóledi, bul aýa sapasynyń nasharlaýyna jáne turǵyndar densaýlyǵyna tikeleı qaýip tóndiredi.
Osyǵan deıin Kólik mınıstrligi Astanada júk kólikterine baqylaýdy kúsheıtkenin jazǵan edik.
