Astanada Ekinshi dúnıejúzilik soǵys ardagerin sońǵy saparǵa shyǵaryp saldy
ASTANA. KAZINFORM – Ekinshi dúnıejúzilik soǵys ardageri Vladımır Ivanovıch Drovosekov 99 jasynda dúnıeden ozdy. Bul týraly Qorǵanys mınıstrliginiń baspasóz qyzmeti habarlady.
Maıdangermen qoshtasý rásimine qalalyq ardagerler keńesiniń, Astana qalasy ákimdiginiń jumyspen qamtý jáne áleýmettik qorǵaý basqarmasynyń ókilderi jáne áskerı qyzmetshiler qatysty. Marqumnyń denesin áskerı orkestrdiń súıemeldeýimen qurmet qaraýyl rotasynyń jaýyngerleri shyǵardy.
Qalalyq ardagerler keńesiniń tóraǵasy Sansyzbaı Esilov óz sózinde Vladımır Drovosekov jas urpaqqa úlgi bolatyn dańqty jaýyngerlik joldan ótti dedi.
– Bizdiń ata-babalarymyz ómirlerin qurban etip, jeńiske jetti. Aman qalǵandary úılerine oralyp, Vladımır Ivanovıch sııaqty soǵystan keıin eldi kórkeıtýge atsalysty. Olardyń esimderi jadymyzda jańǵyryp, júregimizde máńgi qalady, – dedi Sansyzbaı Esilov.
Vladımır Ivanovıch 1926 jyly Soltústik Qazaqstan oblysy Balkashıno aýylynda dúnıege kelgen. Aqmoladaǵy fabrıka-zaýyt ýchılışesin bitirgen soń, temir ustanyń uly № 317 áskerı zaýytta tokar bolyp jumys istedi.
Ol 1944 jyly soǵysqa attanyp, 3-shi Belarýs maıdanynda shaıqasty. Qatardaǵy jaýynger Vladımır Drovosekovtyń saper bólimshesinde «Palma» atty mına izdeýshi ovcharka ıti boldy. Birde ıti saperdiń ómirin ajaldan arashalap qaldy. Degenmen soǵystyń sońynda ıtti qaýipti mıssııaǵa – tankterdi joıýǵa daıyndaıdy. Osylaısha Vladımır Ivanovıch adal dosynan aıyryldy.
Ekinshi dúnıejúzilik soǵys qazaqstandyq sarbaz úshin 1945 jyldyń qyrkúıeginde biraq aıaqtaldy. Eýropadan ol Qıyr Shyǵysqa deıin bardy, Sahalın men Kýrıl araldaryndaǵy teńiz katerlerinde qyzmet etti. Úıine 1952 jyly ǵana oralyp, Aqmoladaǵy arnaıy komendatýrada, sodan keıin vagon jóndeý zaýytynda mehanık bolyp jumys istedi.
Jaýyngerdiń qabirine gúl shoqtary men qalampyrlar qoıyldy. Memlekettik ánuran oryndalǵannan keıin sarbazdyń qurmetine salıýt atyldy.
Qatardaǵy jaýynger Vladımır Drovosekov áskerı jolynda II dárejeli Otan soǵysy ordenimen, jaýmen shaıqasta kórsetken batyldyǵy, tabandylyǵy men janqııarlyǵy úshin jaýynger «Erligi úshin» medalimen marapattaldy.
Aıta ketelik Astanaǵa áskerı bortpen qazaqstandyq UOS jaýyngerleriniń súıegi jetkizilgen edi.