Astanada ekinshi Al Jazeera aptalyǵy ótedi — Medıaforým
ASTANA. KAZINFORM — Prezıdent Teleradıokesheni men Al Jazeera Media Network yntymaqtastyǵy aıasynda qyrkúıek aıynda «Al Jazeera Week» — «Al Jazeera aptalyǵy» ekinshi ret uıymdastyrylmaq.
Bul týraly Al Jazeera medıa ınstıtýtynyń dırektory Iman Ál Amrı Astanadaǵy II Ortalyq Azııa medıaforýmynda aıtty.
Onyń aıtýynsha, «Al Jazeera Media Network» jáne Qazaqstan Prezıdentiniń Teleradıokesheni arasyndaǵy seriktestik ózara yntymaqtastyq týraly memorandýmmen resmı túrde bekitilgen. Bul yntymaqtastyq eki uıym arasyndaǵy medıabaılanystardy nyǵaıtýǵa jáne kásibı damýǵa járdemdesýge baǵyttalǵan.
— Atalǵan seriktestiktiń negizgi bastamalarynyń biri — «Al Jazeera Week» oqytý baǵdarlamasy boldy, baǵdarlama 2024 jyldyń sáýir aıynda Astanada Maqsut Nárikbaev atyndaǵy ýnıversıtette bastaý aldy. Bul baǵdarlama aıasynda Jýrnalıstıka mamandyǵynda oqyp júrgen júzden astam stýdent 150 saǵattan astam ıntensıvti bilim aldy. Ásirese jańalyqtar jazý, data jýrnalıstıka, mobıldi jýrnalıstıka, tsıfrlyq storıtellıng jáne jańalyq júrgizý sııaqty taqyryptarǵa mán berildi, — dedi Iman Ál Amrı agenttik tilshisine bergen suhbatynda.
Sonymen birge, Prezıdent Teleradıokesheniniń jýrnalısteri Qatar astanasy Dohada «Al Jazeera» medıa ınstıtýtynda arnaıy oqýdan ótti. Bul oqytý jasandy ıntellektti jýrnalıstıkada paıdalaný, kontent jasaý, óńdeý quraldary men etıkalyq tásilderge baǵyttaldy. Árbir qatysýshy JI negizindegi óz jobasyn ázirlep, jańa medıatehnologııalar boıynsha praktıkalyq tájirıbe jınady.
— Aldaǵy ýaqytta bul seriktestik 2025 jyldyń qyrkúıeginde Astanada ótetin «Al Jazeera Week»-tiń ekinshi kezeńimen jalǵasady. Baǵdarlama aıasynda jańa trenıngter, master-klasstar jáne Al Jazeera sarapshylarynyń semınarlary ótedi. Bul — Qazaqstandaǵy bolashaq medıa mamandaryna qoldaý kórsetýge baǵyttalǵan mańyzdy qadam. Atalǵan bastamalar Al Jazeera men Prezıdent Teleradıokesheni arasyndaǵy seriktestiktiń tereńdeı túskenin kórsetedi jáne eki eldiń medıa mamandaryna birlesip jumys isteýge, jańa daǵdylardy ıgerýge jáne mazmundy mádenı almasýǵa aýqymdy múmkindik beredi, — deıdi Iman Ál Amrı.
Eske sala ketsek, 2024 jyldyń aqpan aıynda Qasym-Jomart Toqaevtyń Qatarǵa memlekettik sapary aıasynda Prezıdent TRK jáne Al Jazeera Media Network yntymaqtastyq týraly kelisim jasasty.
Al 2024 jyldyń sáýir aıynda «Al Jazeera aptalyǵy» baǵdarlamasy aıasynda Maqsut Narikbayev University Halyqaralyq jýrnalıstıka mektebiniń 100-den astam stýdenti qatarlyq medıa mamandardan bir aptalyq oqýdan ótti.
QR Prezıdentiniń Teleradıokesheni — Qazaqstannyń eń iri medıa kompanııalarynyń biri, onyń quramyna: Jibek Joly, Silk Way, Silk Way Cinema telearnalary, Kazinform halyqaralyq aqparat agenttigi jáne Derekti kıno ortalyǵy kiredi.
Al Jazeera Media Network — 1996 jyly Qatar ámiriniń jarlyǵymen qurylǵan halyqaralyq telekompanııa. Búgingi tańda álem boıynsha 80-nen astam, onyń ishinde AQSh-ta 12 bıýrosy bar aýqymdy korrespondenttik jeli 150 elden aqparat taratady. Kompanııada 95 elden 4 myń adam qyzmet etedi.