Astanada ekinshi ret trıatlonnan Álem kýbogy ótedi
ASTANA. QazAqparat - 2019 jyly Astanada ekinshi márte trıatlonnan Álem kýbogynyń kezeńi ótedi, dep habarlaıdy QazAqparat tilshisi.
QR Ulttyq Olımpıadalyq komıtettiń habarlaýynsha, búgin Avstralııada Halyqaralyq Trıatlon Odaǵynyń kezekti HHHІ kongresi ótti. Jıynǵa 46 eldiń ókilderi qatysyp, aldaǵy josparlardy talqylady.
Kongreske álemdegi ulttyq federatsııalardyń barlyǵy derlik qatysty. Onyń ishinde, qazaqstandyq delegatsııa da bar.
Jıynda ITU bıylǵy maýsymdy qorytyndylap, mańyzdy máselelerdi talqylady. Sondaı-aq, trıatlonnan ótkiziletin jarystardyń kestesi túzildi.
Kongreske qatysýshylar 2019 jyldyń 15-16 maýsymynda Qazaqstanda Álem kýbogy kezeńin ótkizýdi biraýyzdan maquldady. Astana óz tarıhynda ekinshi ret trıatlonnan Álem kýbogy kezeńin qabyldamaq.
