Astanada ekinshi aýysymdaǵy 1-9 synyp oqýshylaryna sabaq bolmaıdy
ASTANA. QazAqparat - Astana qalasynda jeldiń kúsheıýine baılanysty ekinshi aýysymda oqıtyn 1-9 synyp oqýshylary úshin sabaq bolmaıdy.
Bul týrly elorda ákimdiginiń saıtynda habarlandy.
Eske salaıyq, «Qazgıdromet» RMK 24-25 qańtar kúnderi týálik boıy jáne 26 qańtar túnde Astana aýmaǵynda burqasyn soǵyp, ońtústik-batystan soqqan jeldiń kúshi 15-20 m/s-qa artatynyn eskertken bolatyn.
Osy ýaqytta elordada respýblıkalyq mańyzdaǵy «Astana-Kókshetaý» avtojoly, «Astana-Atbasar» kúre joly kóliktiń barlyq túrleri úshin jabyq tur.
Sondaı-aq Aqmola oblysy boıynsha «Astana-Petropavl» kúre joly (18-230 shaqyrym aralyǵy Astana qalasy - Şýchınsk qalasy), «Jaqsy-Esil-Buzulyq» avtojoly (0-82 shaqyrym aralyǵy, Jaqsy aýyly - Buzulyq aýyly), «Qostanaı-Áýlıekól-Sýrgan» avtojoly (232-260 shaqyrym aralyǵy, Qostanaı obl. aýmaǵy - Sýrgan aýyly), «Jezqazǵan-Petropavl» tas joly (377-595 shaqyrym aralyǵy, Qostanaı obl. aýmaǵy - SQO), «Ekaterınbýrg-Almaty» avtojoly (856-1006 shaqyrym aralyǵy, SQO aýmaǵy- Atbasar q.) barlyq avtokólik túrlerine jabyldy.
