Astanada eki jyl boıy adam saýdasymen aınalysqan qylmystyq top sottaldy
ASTANA. 18 tamyz. QazAqparat /Arman Asqarov/ - Búgingi tańda respýblıka sottarynda qaralǵan isterdiń ishinde adam saýdasyna qatysty qylmystar jıi kezdesedi.
Bul týraly búgingi baspasóz máslıhatynda QR Joǵarǵy sotynyń resmı ókili Natalıa Peters málim etti.
Jýyrda Aqmola oblysynyń mamandandyrylǵan qylmystyq ister jónindegi sotynda 2008-2010 jyldar aralyǵynda aldyn-ala ýaǵdalastyq boıynsha Astana men Aqmola oblysynda turatyn jasy kámeletke tolmaǵan boıjetkenderdi urlap, jezókshelikpen aınalysýǵa májbúrlep, adam saýdasymen aınalysqan qylmystyq top múshelerine qatysty is qaraldy. Sot materıaldaryna sáıkes, top basshysynyń jospary boıynsha eki qylmysker Astananyń ortalyq kóshelerinde jáne saýda oryndarynda jasóspirimdermen tanysyp, olardyń senimine engennen keıin kúsh qoldaný arqyly jalǵa alynǵan páterlerge aparyp, soqqyǵa jyǵyp, qamaýda ustaǵan. Toptyń ózge músheleri kúzetý, aqsha tólep, jynystyq qatynasqa túskisi kelgen adamdardy izdep, qarjy jınaýmen aınalysqan. Alty adamnan quralǵan top eki jyl boıy osy qylmyspen aınalysqan.
Atalmysh is boıynsha mamandandyrylǵan qylmystyq ister jónindegi sottyń úkimimen qylmystyq top basshysy barlyq múlkin tárkileýmen 15 jylǵa, toptyń ózge músheleri múlikterin tárkileýmen 8-13 jyldarǵa bas bostandyǵynan aıyryldy. Qylmyskerler óz jazasyn qatań rejımdegi túzeý mekemesinde óteıdi. Sot úkimi áli zańdy kúshine engen joq.
