Astanada eki márte Keńes Odaǵynyń Batyry T. Bıgeldınov týraly fılmniń tusaýy kesildi
Fılmniń stsenarııin QR mádenıet qaıratkeri Lavrentıı Son jazǵan, qoıýshy rejısseri Ergen Toqmyrzın. Talǵattyń jastyq shaǵyn jas akter Ázimhan Ahmet oınaǵan. Sondaı-aq, fılmge sırek kadrlar men T. Bıgeldınovtiń ózi túsken úzindiler de engizilgen. Týyndy «Nur Otan» partııasy men «Altyn Qyran» qaıyrymdylyq qorynyń qoldaýymen, «Generaldar keńesi» Respýblıkalyq qoǵamdyq birlestiginiń bastamasymen júzege asyryldy.
«Fılmdi túsirýge generaldyń ózi jazǵan kitabyndaǵy derekterdi qoldandyq. Sonymen qatar, Almatydaǵy áskerı ınstıtýttyń kýrsanttary men ustazdarynyń kómegimen osy kınony túsirip bittik», - dep atap ótti «Generaldar keńesi» RQB Prezıdıýmynyń tóraǵasy, ádilet general-maıory, professor Rústem Qaıdarov.
Onyń málimetinshe, buǵan deıin Uly Otan soǵysyna qatysqan generaldar S. Nurmaǵambetov pen Á. Bolsambekov týraly fılmder kórermenge jol tartqan. Endigi kezekte Jeńistiń 70 jyldyǵyna oraı Keńes Odaǵynyń Batyry ataǵyn alǵan árbir qazaqstandyq týraly 3-5 mınýttyq shaǵyn derekti fılmder túsirý qolǵa alynbaq.
«T. Bıgeldınov týraly fılm bir jylǵa jýyq túsirildi. Onda surapyl Uly Otan soǵysy jyldary el qorǵaýǵa shaqyrylǵan 19 jastaǵy jigittiń taǵdyry sýretteledi. 1942-1945 jyldary soǵys otyn keshken keıipkerdiń taǵdyry eshkimdi beı-jaı qaldyrmaıdy. Qyr balasy fashıster «Ushqysh tank» dep atap ketken óziniń Il-2 ushaǵymen alǵashqylardyń biri bolyp Berlındi, Kavkaz ben Ýkraınany azat etken bolatyn», - dep atap ótti R. Qaıdarov.
Fılm avtorlary kompıýterlik keskindeýdiń qazirgi ádisterin paıdalana otyryp, «qazaq qyranynyń» áýe shaıqastaryn, sondaı-aq qoıylymdyq túsirilim arqyly T. Bıgeldınovtyń atqysh-mergenmen birge jaý qorshaýyn buzyp shyǵý urysyn beınelep shyǵardy.
Sharaǵa «Nur Otan» partııasy Tóraǵasynyń birinshi orynbasary Baýyrjan Baıbek, Uly Otan soǵysy jáne tyl ardagerleri, mektep oqýshylary qatysty. Fılm 9 mamyr kúni saǵat 13:10-da «Astana» jáne saǵat 17:15-te «Habar» telearnalarynan kórsetiledi.
