Astanada eki kúnde 6 avtokólik tonaldy

Bul týraly qalalyq Іshki ister departamentiniń baspasóz qyzmetinen habarlady.

Taratylǵan habarlamaǵa súıensek, 22 qazan kúni, keshqurym Saryarqa aýdandyq Іshki ister basqarmasyna B. esimdi azamat shaǵymdanyp, «Alash» ortalyq bazary aýmaǵynda turǵan «BMW» avtokóliginen somasy 50 000 teńge bolatyn jeke múlki urlanǵandyǵy týraly aıtqan. Sol kúni, birinshi qylmys oryn alǵan jerde turǵan «Folksvagen-Passat» avtokóliginen 5 000 teńge turatyn uıaly telefony urlanǵandyǵy týraly S. esimdi azamat aryz berdi.

Kelesi kúni Almaty aýdandyq ІІB-na R. esimdi azamat «Toyota Camry» avtokóliginiń áınegin syndyryp, jalpy somasy 25 000 teńge bolatyn jeke zattaryn (kiltter, sorǵy) urlap áketkendigi týraly aryz túsirdi. Sol kúni Astana qalalyq ІІD-ne Mustafın kóshesiniń boıynda Mersedes, Leksýs, Toıota avtokólikterinen jeke múlikter urlanǵandyǵy týraly birneshe azamat shaǵymdandy.

Búginde atalǵan faktiler boıynsha QR QK 175-baby boıynsha qylmystyq is qozǵaldy. Qylmystardy ashý boıynsha tıisti sharalar qoldanylýda.