Astanada eki jasar búldirshin baqshada býllıngke ushyraǵan

ASTANA. KAZINFORM — Balalardyń quqyqtaryn qorǵaý komıteti Astanada bolǵan jaǵdaıǵa baılanysty túsinikteme berdi.

Astana qalasyndaǵy jekemenshik balabaqshalardyń birinde eki jasar balanyń býllıngke ushyraǵany jóninde anasy QR Oqý-aǵartý mınıstrligi Balalardyń quqyqtaryn qorǵaý komıtetine júgindi.

— Kúni keshe balanyń anasy Komıtet tóraıymy Nasymjan Ospanovamen kezdesip, bolǵan jaǵdaıdy egjeı-tegjeıli baıandady. Kezdesý nátıjesinde atalǵan jaıt boıynsha tekserý júrgizý týraly sheshim qabyldandy. 28 sáýirde Bilim berý sapasyn qamtamasyz etý departamenti tıisti tekserýdi bastaıdy. Aıta keteıik, Komıtet balalardyń quqyqtaryna qatysty árbir ótinish pen shaǵymdy muqııat qarap, nazardan tys qaldyrmaıdy. Ár bala qaýipsizdik pen qamqorlyqqa negizdelgen qarym-qatynasqa laıyq, — delingen vedomstvo habarlamasynda.

Osyǵan deıin elorda dámhanasynda on adam astan ýlanǵanyn jazǵan edik. Sońǵy málimetke sáıkes ýlanǵandar sany 20-ǵa jetip, tergeý júrip jatqany anyqtaldy.