Astanada eki jańa perzenthana boı kóteredi
ASTANA. KAZINFORM — Elorda ákimi Jeńis Qasymbek qaladaǵy medıtsınalyq nysandar tapshylyǵy qalaı sheshiletinin, qaı aýdandarda jańa emhanalar ashylatynyn aıtyp berdi.
Ákimniń aıtýynsha, medıtsınalyq ınfraqurylym tapshylyǵy áli de saqtalyp otyr.
— Bul máseleni sheshý maqsatynda Esil men Nura aýdandarynda eki emhana, Almaty aýdanynda perınataldyq ortalyq, jańa kópsalaly qalalyq aýrýhana jáne Esil aýdanynda balalarǵa arnalǵan travmatologııalyq pýnkttiń qurylysy bastalady. Qalalyq № 2 aýrýhananyń qabyldaý-dıagnostıkalyq kesheniniń qurylysy aıaqtalýǵa jaqyn. Sondaı-aq Saryarqa aýdanynda perınataldyq ortalyq salý jobasy qolǵa alyndy, — dedi J. Qasymbek Ortalyq kommýnıkatsııalar qyzmetinde ótken brıfıngide.
Sonymen birge, sporttyq obektiler jelisi qarqyndy túrde damyp keledi. Ortalyq saıabaqta Inklıýzıvti sport ortalyǵy men Shańǵy bazasy ashylyp jatyr.
— «Qazaqstan» sport saraıy men Q. Muńaıtpasov atyndaǵy stadıondy qaıta jańǵyrtý jumystary jalǵasýda, olardyń aıaqtalýy kelesi jylǵa josparlanǵan, — dedi elorda ákimi.
Buǵan deıin J. Qasymbek 2026 jyly Astanada taǵy 12 mektep salynatynyn aıtqan edi.
Sonymen birge, Astanadaǵy jeńil relsti kólik (LRT) júıesi aldaǵy 1-2 aıda iske qosylady.