Astanada eki jalǵan rıeltor 3 jylǵa sottaldy

ASTANA. KAZINFORM – Astana qalasynyń prokýratýrasy birneshe ret alaıaqtyq jasady dep aıyptalǵan elordanyń eki turǵynyna qatysty memlekettik aıyptaýdy qoldady. Bul týraly Prokýratýranyń baspasóz qyzmeti málim etti. 

«Alaıaqtar «Otbasy bankinde» ıpotekalyq qaryzdy tıimdi sharttarmen resimdeý múmkindigi týraly jábirlenýshilerdi jańylystyrǵany anyqtaldy», - delingen habarlamada.

Mysaly, alaıaqtar jábirlenýshilerdiń birine «Otbasy bank» AQ-ǵa bastapqy jarna retinde engizý úshin 8 mln teńgeden astam somaǵa nesıe resimdeýdi usynǵan. 

Sonymen qatar, nesıe ıpotekalyq qaryzben birge qaıta qarjylandyrylatyny týraly jalǵan málimetter habarlaǵan.

«Kináli tulǵalar óz áreketteriniń jalǵan zańdylyǵyn kórsetý maqsatynda dara kásipkerlik ashyp, keńse bólmesin jalǵa alýy 27 jábirlenýshiniń aqshasyn aldap, ıemdenýge múmkindik bergenin sot talqylaýy barysynda memlekettik aıyptaýshy dáleldedi», - dep habarlady prokýratýradan.

Keltirilgen shyǵyn 30 mln teńgeden asty.

Sot úkimimen kinálilerdiń árqaısysy 3 jylǵa bas bostandyǵynan aıyryldy. Úkim zańdy kúshine endi.

Materıaldyq zalal sottalǵandardan óndirildi.

Qala prokýratýrasy elorda turǵyndary men qonaqtaryn muqııat bolýǵa, usynylatyn qyzmetterdiń durystyǵyna kóz jetkizýge, jalǵan baılanystar men tanystar syltaýymen tıimdi mámileler usynatyn adamdarǵa senbeýdi eskertedi, sebebi bul alaıaqtyqtyń belgisi bolýy múmkin.