Astanada eki sharýashylyq nysany otqa orandy
ASTANA. KAZINFORM – Elordanyń Baıqońyr aýdanynda bolǵan órt kezinde qutqarýshylar qaýipti aımaqtan bir gaz jáne úsh ottegi ballonyn shyǵaryp úlgerdi, dep habarlaıdy TJM.
Oqıǵa T. Hýseın kóshesinde bolǵan. Munda jalpy aýdany 75 sharshy metrdi quraıtyn eki sharýashylyq qurylysy órtengen.
Tótenshe jaǵdaılar mınıstrliginiń qyzmetkerleri oqıǵa ornyna jedel jetip, órtti sóndirý jumystaryna kiristi. Órtti aýyzdyqtaý barysynda mamandar qaýipti aımaqtan bir gaz ballony men úsh ottegi ballonyn qaýipsiz jerge shyǵardy.
- Bul shara yqtımal jarylystyń aldyn alyp, órttiń odan ári taralý qaýpin tómendetýge múmkindik berdi, - dep jazdy vedomstvodan.
Órt tolyq sóndirilip, jalynnyń kórshi nysandarǵa taralýyna jol berilgen joq. Zardap shekkender joq.
Qazirgi ýaqytta órttiń shyǵý sebebi anyqtalyp jatyr.
Aıta keteıik, elordadaǵy saýnadan shyqqan jalyn kottedjge ótkeni habarlandy.
