Astanada eki myńǵa jýyq etnıkalyq qazaq qandas mártebesin aldy

ASTANA. KAZINFORM – Ótken jyly Astanada 1 909 adamǵa qandas mártebesi berildi. Bul týraly qalalyq jumyspen qamtý jáne áleýmettik baǵdarlamalar basqarmasynyń basshysy Ilıa Skýb aıtyp berdi. 

«Ótken 2023 jyly 1 301 adamǵa qandas mártebesin berý josparlandy jáne nátıjesinde 1 909 adam (erler – 997, áıelder – 912) bul mártebeni aldy. Onyń ishinde: Ózbekstannan – 810, Reseı Federatsııasynan – 483, QHR – 465, Mońǵolııadan – 108, Qyrǵyzstannan – 20, Túrikmenstannan – 14, Tájikstannan – 1, Ulybrıtanııadan – 2, Aýǵanstannan – 1, Túrkııadan – 2, Ýkraınadan – 2 jáne Irannan – 1 adam bar», - dedi Ilıa Skýb qalalyq máslıhat otyrysynda.

Spıker 2023 jyldyń 1 shildesinde bıznes-ımmıgranttar bolyp sanalatyn etnıkalyq qazaqtar nemese suranysqa ıe kásipteri bar adamdar úshin azamattyǵyn joǵaltpaı «Ata joly» kartasyn berý fýnktsııasy engizilgenin eske saldy. Karta ıeleri 10 jyl merzimge turýǵa ruqsat alady.

Onyń derekteri boıynsha, 2023 jyly «Ata joly» kartasy 21 adamǵa berildi: 7 – bıznes-ımmıgranttar, 14 – suranysqa ıe mamandyqtary bar adamdar. Olardyń ishinde Reseı Federatsııasynan – 12, Mońǵolııadan – 4, Túrikmenstannan – 1, Germanııadan – 1, Túrkııadan – 1, Aýstrııadan – 1, Izraılden – 1 etnıkalyq qazaq bar. Sondaı-aq 6 etnıkalyq qazaqtyń ótinimi qabyldanbaǵan.