Astanada eki memlekettik Oqýshylar saraıy ashyldy
ASTANA. KAZINFORM — Astana ákimi Jeńis Qasymbek Instagram áleýmettik jelisine Memleket basshysynyń tapsyrmasy boıynsha elordada taǵy eki memlekettik Oqýshylar saraıyn — «TANYM ART» jáne «TANYM SPORT» kópfýnktsıonaldy keshenderi ashylǵanyn habarlady.
Qala ákiminiń sózinshe, olar balalardyń shyǵarmashylyq, zııatkerlik jáne sporttyq áleýetin damytýǵa baǵyttalǵan.
Jalpy aýdany 12 myń 225 sharshy metrdi quraıtyn úsh qabatty ǵımarattardyń árqaısysynda basseın, sport jáne kontsert zaldary, oqý kabınetteri, kovorkıng-aımaqtar jáne t. b. qarastyrylǵan. Keshenderde STEM-tehnologııalar, tehnıkalyq jáne ǵylymı shyǵarmashylyq, sol sııaqty ekologııalyq-bıologııalyq baǵyttar boıynsha sabaqtar ótkizý josparlanyp otyr.
— Memleket basshysy Qasym-Jomart Kemeluly Toqaevtyń tapsyrmasy aıasynda áleýmettik ınfraqurylymdy damytýǵa erekshe kóńil bólemiz. Jyl saıyn jańa mektepter, balabaqshalar men Oqýshylar saraılaryn ashamyz, — dep jazdy ol.
Búgin QR Týrızm jáne sport mınıstri Erbol Myrzabosynovpen jáne QR Oqý-aǵartý mınıstri Juldyz Súleımenovamen birge Oqýshylar saraıyna bardyq. Balalarmen áńgimelesip, ortalyqtyń jumysymen tanystyq.
Іs-sharaǵa belgili sportshylar da qatysty. Olardyń arasynda dzıýdodan álem jáne Azııa chempıonattarynyń kúmis júldegeri Ábıba Ábýjaqynova, Parıj Olımpıadasynyń qola júldegeri Ǵusman Qyrǵyzbaev, bokstan Olımpıada oıyndarynyń eki dúrkin kúmis júldegeri Ádilbek Nııazymbetov, Tokıo Olımpıadasynyń qola júldegeri Qamshybek Qońqabaev jáne álemniń eki dúrkin chempıony Sanjar Tashkenbaı bar.
Jańa memlekettik keshender elordadaǵy qosymsha bilim berý ınfraqurylymyn keńeıtip, balalardyń bos ýaqytyn tıimdi ótkizýine jáne qabiletterin damytýyna jaǵdaı jasaıdy. Sonymen qatar, ár keshende 100-den astam jumys ornyn ashý kózdelgen.
«TANYM ART» kesheni Saryarqa aýdanyndaǵy Beıbarys sultan kóshesi, 15 mekenjaıynda ornalasqan. Al «TANYM SPORT» kesheni Almaty aýdanynyń Tóleýbaev kóshesi, 3 mekenjaıynda ashyldy.
— Osyǵan deıin qalada tórt Oqýshylar saraıy ashylǵan bolatyn, olardyń arasynda jeke ınvestıtsııalar da qarastyrylǵan. Bul baǵyttaǵy jumysty ary qaraı jalǵastyramyz, — dep jazdy Jeńis Qasymbek.
