Astanada eki deńgeıli jol jobasy júzege asa ma
ASTANA. KAZINFORM — Byltyr jeltoqsanda Memleket basshysy Qasym-Jomart Toqaev Úkimetpen jáne ákimdikpen birlesip, Táýelsizdik dańǵylyn uzartý jumystaryn jalǵastyrý qajettigin aıtqan bolatyn. Sondaı-aq, Prezıdent Qabanbaı batyr dańǵylynda eki deńgeıli jol salý jobasyn qoldaǵan edi.
Osyǵan baılanysty Astana qalasynyń Kólik jáne jol-kólik ınfraqurylymyn damytý basqarmasy joba jaıly túsinik berdi. Basqarmanyń málimetinshe, joba qazirgi ýaqytta jobalaýdy bastaýǵa qajetti bastapqy derekterdi jınaý satysynda tur. Tehnıkalyq sharttardy naqtylaý, qoldanystaǵy ınfraqurylymdy taldaý, sondaı-aq bastapqy-ruqsat berý qujattaryn jınaý jáne óńdeý jumystary júrgizilip jatyr.
— Osy kezeń aıaqtalǵannan keıin jobalyq-smetalyq qujattamany ázirleý jumystary bastalady. Injenerlik izdenister men keıingi jobalaý barysynda kópdeńgeıli jol sheshimderin, onyń ishinde estakadalar, tonnelder jáne ózge de kólik qurylystaryn salý qajet bolatyn ýchaskeler aıqyndalady, — delingen habarlamada.
Sondaı-aq jobanyń sońǵy parametrleri men konfıgýratsııasy jobalyq-smetalyq qujattama ázirlengennen keıin, kólik júktemesi, qala qurylysy talaptary jáne qaýipsizdik normalary eskerile otyryp anyqtalady dep atap ótilgen.
— Qazirgi tańda joba bastapqy derekterdi jınaý satysynda bolǵandyqtan, ony iske asyrýdyń aldyn ala quny áli belgilengen joq. Baǵalaý jobalyq-smetalyq qujattama ázirlengennen keıin júrgiziledi, — dep jaýap berdi ákimdikten. Eske sala keteıik, Jeńis Qasymbek LRT jelisi qashan iske qosylatynyn aıtqan edi.
Sonymen qatar Astananyń jańa kelbetin aıqyndaıtyn dızaın-kod jasalady.
