Astanada eki birdeı ana úshem bosandy

ASTANA. KAZINFORM – Elordada araǵa az ýaqyt salyp eki ret úshem (6 sábı) dúnıege keldi. Qýanyshty habarmen qalalyq qoǵamdyq densaýlyq saqtaý basqarmasynyń baspasóz qyzmeti bólisti.

№2 qalalyq kópbeıindi aýrýhanada baqytty ana Aısha Iskakova úshemdi dúnıege ákeldi. Nurlandar áýletinde dúnıege kelgen nárestelerdiń biri – qyz, ekeýi – ul. 

«Jańa týǵan balalardyń atyn Tomırıs, Ibrahım jáne Mýhammad dep qoıdyq. Ózimiz buǵan deıin de 2 bala tárbıelep otyr edik, endi birden 5 balanyń anasy atandym. Qýanyshymyzda shek joq, dárigerlerge myń alǵys! Bizdiń otbasymyzdaǵy qýanysh kópke juǵysty bolsyn», – dep úshemniń anasy Aısha aýrýhananyń akýsherlik blok ujymyna alǵys aıtty. 

Aısha Iskakova 33-aptada bosandy. Salmaǵy 2135, 1965 jáne 1580 gramm quraǵan jańa týǵan náresteler 21 qazan kúni aýrýhanadan shyǵarylyp, búginde óz úıinde otbasymen alǵash merekelerin qarsy almaq. Respýblıka kúni qarsańynda úshemniń dúnıege kelýi jaqsylyqtyń habarshysy, úlken qýanyshtyń basy bolsa kerek», – dedi aýrýhana dırektorynyń bosandyrý jónindegi orynbasary Dáýren Mýsın. 

Taǵy bir súıinshi jańalyq, elordanyń dál osy aýrýhanasynda (22 qazanda) Sabına Altynbekqyzy úsh batyrdy dúnıege ákeldi. Úshemniń esimin atasy Qabanbaı, Bógenbaı, Naýryzbaı dep qoıǵan. 

«Nemelerimniń esimin batyrlarymyzdyń atyn jańǵyrtaıyq, sol tulǵalar sekildi el azamattary bolsyn degen nıetpen qoıdym. Ózim Tarazda turamyn, ulym men kelinim Astanada turady, kelinim bosanǵan soń qýanyshqa oraı arnaıy Astanaǵa keldim. Qazir kelinim men nemerelerim aýrýhanada, dárigerlerdiń qaraýynda, jaǵdaılary jaqsy. Sábılerdiń qataıǵanyn kútip otyrmyz, sosyn shyǵaryp alamyz», - deıdi úshemniń atasy Jambyl Imanálıev.