Astanada eki balalar kitaphanasy ashyldy
ASTANA. KAZINFORM — Astana qalasynyń ákimi Jeńis Qasymbek Instagram paraqshasynda jańadan ashylǵan kitaphanalar týraly jazdy. Bul týraly elorda ákimdiginiń resmı saıty habarlady.
«Dostar! Ózderińiz biletindeı, balalardy erte jastan kitap oqýǵa baýlýdyń mańyzy zor. Bul balanyń saýatyn arttyryp, sózdik qoryn kóbeıtip qana qoımaı, kókjıegin de keńeıtýge áser etedi. Sońǵy birneshe jylda qalamyzda jańa kitaphanalar ashylǵan joq. «Ortalyqtandyrylǵan kitaphanalar júıesi» 18 kitaphanadan turatyn. Bıyl biz 4 kitaphana ashamyz. Olardyń 2-eýi qazirdiń ózinde ashyldy», - dep jazdy qala ákimi.
Ákimniń habarlaýynsha, buqaralyq kitaphana Nájimedenov kóshesi, 27 mekenjaıynda bolsa, balalar kitaphanasy — Bókeıhan kóshesi, 25v-da ornalasypty.
«Búgin balalarǵa arnalǵan jańa kitaphanaǵa bardym. Jalpy aýdany 340 sharshy metrdi quraıtyn kitaphana balalarǵa qyzmet kórsetýge arnalǵan. Degenmen eresekter de kitaphana qyzmetin paıdalana alady. Bul kitaphananyń qory 3 myńǵa jýyq jańa kitaptan turady. Memleket basshysy kitap oqıtyn halyq qana naǵyz ıntellektýaldy bola alatynyn aıta kele, «Biz jas urpaqtyń kitapqa qushtarlyǵyn oıatýymyz kerek» degen», - dep jazdy qala basshysy.
Jeńis Qasymbektiń aıtýynsha, jýyrda Astanada taǵy eki kitaphana ashylady. Osylaısha, shahardaǵy kitaphanalar sany 22-ge jetedi. Olardyń arasynda zaǵıp jáne nashar kóretin azamattarǵa arnalǵan kitaphana da bar.
«Sol sııaqty qoldanystaǵy kitaphanalardy jańǵyrtý jumysymen de aınalysamyz. Ótken jyly 4 kitaphanany, bıyl taǵy 4 kitaphanany jańarttyq. Qalalyq jeliniń kitap qory 800 myńǵa jýyq danany quraıdy. Máselen, qazirgi ýaqytta kitaphana qoryna berilgen kitaptar sany ótken jylmen salystyrǵanda 30%-ǵa artty, bul oqyrmandardyń ósýine de aıtarlyqtaı áser etti. Kitaphanalar — bilim ortalyǵy ǵana emes ári demalys orny!», - dep jazdy Jeńis Qasymbek.
