Astanada egiz aǵaıyndy qutqarýshy bolyp birge qyzmet etedi
ASTANA. KAZINFORM — 19 qazan — Qutqarýshylar kúni. Astanadaǵy Asqar Zabıkýlın atyndaǵy № 6 mamandandyrylǵan órt sóndirý bóliminde egiz aǵaıyndy Aısultan men Nursultan Kemaladınovtar jeti jylǵa jýyq ýaqyttan beri qyzmet etip keledi, dep habarlaıdy elorda ákimdiginiń resmı saıty.
Osy ýaqyt ishinde olar túrli tótenshe jaǵdaılardyń saldaryn joıýǵa jáne qala turǵyndaryn qutqarýǵa qatysqan.
Aǵaıyndy Kemaladınovtar Qyzylorda oblysynyń Aral aýdanynda dúnıege kelgen. 2015 jyly otbasymen birge Astanaǵa qonys aýdarǵan. Kolledjdi támamdap, áskerı boryshyn ótegen soń, 2019 jyly órt sóndirý qyzmetine ornalasqan.
Egizderdiń bul mamandyqty tańdaýyna órt sóndirýshi bolyp qyzmet etken aǵalary Aıdarhan Kemaladınov yqpal etken.
— Otbasymyzda tórt aǵaıyndymyz. Bizdiń aldymyzda aǵamyz ben ápkemiz bar. Biz — úıdiń kenjesimiz. 2019 jyly 21 jasymyzda qyzmetke kelgende, ujymdaǵy eń jas mamandardyń qatarynda boldyq. Tájirıbeli áriptesterimizden kóp nárse úırendik. Ásirese, qyzmettik boryshyn óteý kezinde qaza tapqan Asqar Zabıkýlındi úlgi tutamyz. Bolashaqta bilimimizdi jalǵastyryp, ofıtserlik quramǵa qosylýdy josparlap otyrmyz, — deıdi Aısultan Kemaladınov.
Qutqarýshylardyń jumysy joǵary fızıkalyq daıyndyqty, tózimdilikti jáne shuǵyl sheshim qabyldaı bilýdi talap etedi. Olar táýliktik kezekshilik atqaryp, shaqyrtý túsken sátte oqıǵa ornyna attanýǵa daıyn turady.
Aısultannyń aıtýynsha, órt sóndirýshiler tek qala aýmaǵyndaǵy oqıǵalarǵa ǵana emes, qajet bolǵan jaǵdaıda basqa óńirlerdegi tótenshe jaǵdaılardyń saldaryn joıýǵa da jumyldyrylady.
— Ádette kezekshilik kezinde órtke baılanysty eki-úsh shaqyrtý túsedi. Budan bólek, jol-kólik oqıǵalaryna, lıftide qalyp qoıǵan nemese basqa da qıyn jaǵdaıǵa tap bolǵan adamdarǵa kómek kórsetýge shyǵamyz. Qajet bolǵan jaǵdaıda alǵashqy medıtsınalyq kómek kórsetýge de daıynbyz, — deıdi ol.
Órt sóndirýshiler úshin ár mınýt mańyzdy. Shaqyrtý túsken boıda jeke quram arnaıy kıimderin kıip, órt sóndirý tehnıkasymen oqıǵa ornyna shuǵyl attanady.
Qutqarýshylardyń qorǵanys kıimi men qural-jabdyqtarynyń jalpy salmaǵy 30 kelige deıin jetýi múmkin. Al syǵylǵan aýasy bar tynys alý apparatynyń salmaǵy shamamen 12 kelini quraıdy.
Egizderdiń biri Nursultan Kemaladınov órt sóndirý kezinde fızıkalyq kúshpen qatar, komandalyq jumystyń da mańyzdy ekenin atap ótti.
Búginde Aısultan men Nursultan Kemaladınovtar Asqar Zabıkýlın atyndaǵy № 6 mamandandyrylǵan órt sóndirý bóliminde qyzmetin jalǵastyryp keledi. Aǵasynyń jolyn qýyp, bir mamandyqty tańdaǵan egizder úshin basty mindet — tótenshe jaǵdaı kezinde adam ómirin saqtap qalý jáne turǵyndardyń qaýipsizdigin qamtamasyz etý.
Buryn Prezıdent qutqarý salasy qyzmetkerlerin memlekettik nagradalarmen marapattaǵanyn jazǵan edik.
