Astanada «E-jedel járdem» kólikteri paıda bolady
ASTANA. 18 qazan. QazAqparat /Gúlmıra Alıakparova/ - Astanada aǵymdaǵy jyldyń jeltoqsanynda jedel medıtsınalyq járdem kólikteri zamanaýı jabdyqtarmen jáne GPS-navıgatsııalarmen jaraqtandyrylǵan «E-jedel járdemder» ilki jobasy iske qosylady.
Bul týraly «Astana Innovations» AQ-dan habarlady.
«Aǵymdaǵy jyldyń jeltoqsanynda Astana qalasynda «E-jedel járdem» ilki jobasy iske qosylady. 60 jedel járdem kóligi quramyna GPS-navıgator, IP-telefonııa, planshet negizindegi elektrondy anyqtamalyq enetin - zamanaýı aqparattyq-apparat keshenimen jabdyqtalatyn bolady», - delingen taratylǵan habarlamada.
Málim etilgendeı, jedel járdem kólikterin GPS-navıgatsııa júıesimen jabdyqtaý naýqastyń úıine anaǵurlym tezirek jetýge, al IP-telefonııa - ldsherge kezekshi dárigermen «baılanysta» bolýǵa, vıdeorejimde keńester alýǵa jáne shuǵyl otalarǵa daıyn otyrý úshin kezekshi bólimmen baılanysyp otyrýǵa múmkindik beredi. Elektrondy anyqtamalyq syrqattyń belgilerine naqtyraq dıagnostıka jasaýǵa jáne jaǵdaıǵa baılanysty jasalýy tıis shuǵyl is-qımyldar boıynsha keńester beredi.
«E-jedel járdem» jobasy ortalyqtandyrylǵan basqarýdy, servıs pen qaýipsizdiktiń jańa deńgeıin qarastyratyn qalanyń ınfraqurylymyn jańǵyrtýǵa baǵyttalǵan «Smart Astana» («Aqyldy qala») jalpy tujyrymdamasy aıasynda júzege asyrylýda.
«Astana Innovations» - Astana ákimdiginiń qurylymdyq bólimshesi, elordanyń ınnovatsııalyq damýyn qamtamasyz etedi. Ókiletti memlekettik organy «Astana - jańa qala» arnaıy ekonomıkalyq aımaǵynyń ákimshilendirýin basqarý» MM bolyp tabylady.
