Astanada «E-jedel járdem», «Aqyldy úı», «Búgingi bolashaq mektep», «Avtomattandyrylǵan farmatsevt» jobalary iske qosyldy

ASTANA. 21 qarasha. QazAqparat - Elordanyń zııatkerlik damý jobalaryn júzege asyrý 28 qarashada «Kórme» ortalyǵynda ótetin «Smart Astana-2012» konferentsııasynda talqylanatyn eń ózekti taqyryp bolmaq, - dep habarlaıdy elordanyń resmı saıty «Astana Innovations» AQ baspasóz qyzmetine silteme jasap.

Konferentsııa aıasynda 2011-2012 jyldary engizilip, iske qosylǵan «Smart Astana» jobalarynyń kórmesi ótkiziledi. Ol - «E-jedel járdem», «Kúıshi Dına, 37-degi «Aqyldy úı», «Búgingi bolashaq mektep», «Smart-lıft» jáne «Avtomattandyrylǵan farmatsevt» jobalary. Júzege asyrý kezeńiniń alǵashqy qorytyndylary «Smart Astana-2012» konferentsııasynda shyǵarylady .

«Smart Astana» konferentsııasy bul - elorda turǵyndary men qonaqtary úshin qyzmet kórsetý sapasyn arttyrý, áleýmettik ınfraqurylymdy damytý men ınnovatsııany engizý, qalanyń básekege qabilettiligi ózekti taqyryptaryn talqylaý úshin turaqty jumys isteıtin alań qurýǵa baǵyttalǵan jyl saıynǵy qalalyq is-shara.

Konferentsııa jumysyna QR ortalyq atqarýshy organdary basshylary, ınnovatsııalyq qaýymdastyq ókilderi, IT energetıka, bilim, medıtsına salasyndaǵy qazaqstandyq jáne sheteldik sarapshylar, jabdyqtar men tehnologııa óndirýshiler, basqa da adamdar qatysady.

Konferentsııa aıasynda «Smart Astana balalary», «Úzdik ınnovatsııalyq mekeme/baǵynystaǵy kásiporyn» baıqaýlarynyń qorytyndylary shyǵarylady.