Astanada E.Mergenovtiń «Erkindik» atty jeke kórmesi ótedi
ASTANA. QazAqparat - Astanada 27 aqpannan 13 sáýirge deıin alǵash ret álemge áıgili qazaqstandyq músinshi Erkin Mergenovtiń jeke kórmesi ótedi. Reseı, Anglııa, AQSh jáne álemniń basqa da memleketteriniń ónertanýshylary, ǵalymdary onyń shyǵarmashylyǵyna joǵary baǵa bergen. Bul týraly astana.kz saıtyna Qazirgi zamanǵy óner murajaıynan habarlady.
«Erkindik» atty erekshe kórmede 1968-2009 jyldary paıda boǵlan 15 óner týyndysy kórermender nazaryna usynylady. Murajaı kollektsııasynan ekspozıtsııaǵa 2007 jáne 2004 jyldary satyp alynǵan «Neke» (1979) jáne «Tańsári» (2003) músinderi, al avtordyń jeke jınaǵynan «Sheńber» (1968), «Mahambet» (1973), «Kesh» (1973), «Jamal» (1975), «Bala jyly» (1979), «Ekeýi» («Daladaǵy taltús») (1985), «Ekeýi. Qozy-Kórpesh pen Baıan Sulý» (1985), «Neke - 11» (1985), «Qýanysh» (2002) jáne «Aǵash daýysy» (2009) eńbekteri qoıylady.
Aıta keteıik, kórme ataýy sýretshiniń shyǵarmashylyǵynyń epıgrafy ispetti. «Erkindik» - bul ustanym, sýretshiniń shyǵarmashylyq jáne azamattyq pozıtsııasyn, dástúrli taqyryptardyń qatań shegine syımaıtyn ónerdiń mán-maǵynasyn anyqtaıtyn oı-pikirin jetkizýi. Mergenov Qazaqstannyń beıneleý óneriniń tarıhy men damýynda úlken iz qaldyrǵan alpysynshy jyldardaǵy daryndy sýretshilerdiń biri. Ortalyq Azııada tanymal sýretshi, «qazaq modernızminiń klassıgi, maksımalıst», professor, pedagog, Qazaq KSR eńbek sińirgen qaıratkeri (1981), Qazaqstannyń halyq sýretshisi (1991), «Platınaly Tarlan» táýelsiz syılyǵynyń laýreaty (2002), Halyqaralyq sýretshiler konfederatsııasynyń turaqty múshesi (Reseı), kóptegen maqalalar men jarııalanymdardyń avtory, qoǵam qaıratkeri.
Eske salaıyq, «Erkindik» kórmesiniń vernısajy 27 aqpanda saǵat 18.30-da Qazirgi zamanǵy óner murajaıynda ótedi.
