Astanada dzıýdodan Qazaqstan Barysy Grand Slam 2026 bastaldy
ASTANA. KAZINFORM - Búgin elorda tórinde dzıýdodan álemdik reıtıngtik Qazaqstan Barysy Grand Slam 2026 týrnıri ótip jatyr. 8–10 mamyr kúnderi aralyǵynda ótetin baıraqty báseke bıyl Qazaqstanda tórtinshi márte uıymdastyrylyp otyr, dep habarlaıdy QR Týrızm jáne sport mınıstrliginiń baspasóz qyzmeti.
Jarys Jaqsylyq Úshkempirov atyndaǵy jekpe-jek saraıynda ótetin dodaǵa álemniń úzdik dzıýdoshylary kelgen. Jarys talaptaryna saı 39 elden 300-den astam sportshy tirkeldi. Týrnır barysynda Olımpıada chempıondary men júldegerleri, álem chempıondary, sondaı-aq álemdik reıtıngtiń kóshbasshylary baq synaıdy.
Halyqaralyq dzıýdo federatsııasynyń (IJF) talaptaryna sáıkes, jarys qorytyndysy boıynsha jeńimpazdar men júldegerlerge álemdik jáne Olımpıadalyq reıtıng upaılary beriledi. Bul upaılar sportshylar úshin 2028 jyly Los-Andjeles qalasynda ótetin jazǵy Olımpıada oıyndaryna joldama alý jolyndaǵy mańyzdy kezeń bolmaq.
Qazaqstan Barysy Grand Slam týrnıriniń Astanada turaqty túrde ótýi Qazaqstannyń halyqaralyq sport arenasyndaǵy bedelin arttyryp, eldegi dzıýdo sportyn damytýǵa serpin beredi.
Aıta keteıik, 2027 jyly Astana dzıýdodan álem chempıonatyn qabyldaıdy. Bul Qazaqstannyń iri halyqaralyq jarystardy joǵary deńgeıde uıymdastyryp, álemdik dzıýdo kartasyndaǵy ornyn nyǵaıtyp kele jatqanyn kórsetedi.
Jarysty Qazaqstan ulttyq arnasynan, QazSport arnasy men Judo TV ınternet arnasyna tamashala alasyzdar.
Osyǵan deıin Astanadaǵy Grand Slam týrnırine qatysatyn qazaqstandyq dzıýdoshylar týraly jazǵan edik.
