Astanada dzıýdodan Qazaqstannyń jekeleı chempıonaty márege jetti
ASTANA. QazAqparat - Astanada dzıýdodan Qazaqstannyń jekeleı chempıonaty márege jetti, dep habarlaıdy QazAqparat tilshisi.
Qazaqstan dzıýdo federatsııasynan málim etkenindeı, úsh kúnge sozylǵan el birinshiligine Qazaqstannyń 14 oblysy men Astana, Almaty, Shymkent qalalarynan 437 dzıýdoshy qatysyp, baq synady.
Jarystyń sońǵy kúninde bes salmaq dárejesi boıynsha jeńimpaz-júldegerler anyqtaldy.
Áıelder arasynda 78 kelige deıingi salmaqta el namysyn qorǵap júrgen Almaty qalasynyń ókili Zarına Raıfova óziniń myqty ekendigin dáleldedi. Shyǵysqazaqstandyq Nazerke Tileýhanova ekinshi, qostanaılyq Margarıta Grıtsenko men atyraýlyq Elmıra Samıǵollaeva úshinshi orynǵa ıe boldy.
78 keliden joǵary salmaqta aqmolalyq Kamıla Berliqash úzdik shyqty. Atyraýlyq Saıda Qapsalyqova ekinshi, qos qyzylordalyq arý Merýert Ábýbákir men Qymbat Turshabek úshinshi orynǵa kóterildi.
Erler arasynda 90 kelige deıingi salmaqta fınalda Gran-prı kezeńiniń jeńimpazy, qaraǵandylyq Islam Bozbaevty utqan jambyldyq Azız Qalqamanuly jeńimpaz atandy. Shymkenttik Ersultan Muzapparov pen qaraǵandylyq Rega Palkın qola júldeni qanaǵat tutty.
100 kelige deıingi salmaqta almatylyq Vıktor Demıanenko top jardy. Odan jeńilgen qyzylordalyq Ádilhan Qozybaev kúmis júldeni enshiledi. Atyraýlyq Arman Qalıev pen taǵy bir qyzylordalyq Aıbek Serikbaev úshinshi orynmen shekteldi.
Asa aýyr salmaqta (+100 kg) qazaq kúresinen bıylǵy «Qazaqstan barysy» týrnıriniń fınalısi, jýyrda Tashkentte Gran-prı kezeńiniń qola júldegeri atanǵan shyǵysqazaqstandyq Erasyl Qajybaev eshkimge jeńistik bermedi. Qazaq kúresinen 2017 jylǵy «Qazaqstan barysynyń» jeńimpazy, qyzylordalyq Elaman Erǵalıev ekinshi, batysqazaqstandyq Temirlan Kólbaı men shyǵysqazaqstandyq Ádil Orazbaev úshinshi orynǵa ilikti.
Batys Qazaqstan oblysynan osyǵan deıin 73 kg salmaqta 20 jasar Ańsarbek Ǵaınýllın kúmis júldeger atanǵan bolatyn. Eresekter arasynda alǵash ret synǵa túskenine qaramastan, Ańsarbek (bapkeri Talǵat Balmaǵambetov) jartylaı fınalda Rıo Olımpıadasyna qatysýshy, álemdik Gran-prı kezeńiniń jeńimpazy, qaraǵandylyq Jansaı Smaǵulovty jeńdi. 100 keliden joǵary salmaqta qola júldeger atanǵan Temirlan Kólbaı Aqsaı qalasynda Qasym Qajenovtiń qol astynda jattyǵady.
16 qarasha kúni dzıýdodan Qazaqstan chempıonatynyń komandalyq saıystary ótedi.
Eske sala keteıik, budan buryn ekinshi jarys kúninde bes salmaq dárejesi boıynsha QR chempıondary anyqtalǵanyn jazǵan bolatynbyz.
