Astanada dzıýdodan Qazaqstan chempıonaty ótedi
ASTANA. QazAqparat - Astana ákimdiginiń qoldaýymen 13-16 qarasha aralyǵynda bas qaladaǵy «Dáýlet» sport keshenińde erler jáne qyzdar arasynda dzıýdodan Qazaqstan Respýblıkasynyń chempıonaty ótedi, dep habarlaıdy elorda ákimdiginiń resmı saıty.
Chempıonatqa 14 oblys pen Astana, Almaty, Shymkent qalalarynyń tórt júzden astam sportshysy qatyspaq. Olardyń qatarynda Álem chempıonatynyń kúmis júldegeri Rýstam Ibraev, jastar arasyndaǵy álem birinshiliginiń qola júldegeri Janbolat Begtegenov jáne Baýyrjan Nazarbaev, Gran-prı serııasy chempıondary Gýsman Qyrǵyzbaev, Jansaı Smaǵulov, Islam Bozbaev, Azııa oıyndarynyń qola júldegeri Eldos Jumaqanov, álemdik Gran-prı kezeńiniń júldegerleri Vıktor Demıanenko jáne Bekádil Shaımerdenov, Olımpıada oıyndarynyń kúmis júldegeri Eldos Smetov, Álem chempıonatynyń kúmis júldegeri Erlan Serikjanov, Azııa oıyndarynyń chempıony Dıdar Hamza, Olımpıada oıyndarynyń qola júldegeri Galbadrah Otgontsetseg bar.
Jarysty uıymdastyrýshylary taratqan aqparatqa súıensek, Azııa oıyndarynyń qola júldegeri Gúljan Isanova jaraqatyna baılanysty jarysqa qatyspaıdy.
Jarys qorytyndysy boıynsha jattyǵýshylar shtaby 2019 jylǵa dzıýdodan Ulttyq qurama quramyn bekitedi.
Foto: astana.gov.kz
