Astanada dzıýdodan Qazaqstan chempıonaty bastaldy
Elordada dzıýdodan erler men áıelder arasyndaǵy Qazaqstan chempıonaty bastaldy, dep habarlaıdy Kazinform.
Týrızm jáne sport mınıstrliginiń málimetinshe, Astanadaǵy Jaqsylyq Úshkempirov atyndaǵy Jekpe-jek saraıynda ótip jatqan bıylǵy el birinshiligine elimizdiń 17 oblysy men Astana, Almaty jáne Shymkent qalalarynan barlyǵy 500-ge jýyq (erler 320, áıelder 144) dzıýdoshy qatysyp jatyr.
Astana tatamıinde beldesip jatqan balýandar qatarynda búginde ulttyq qurama sapynda álemdik dodalarda el namysyn qorǵap júrgen tanymal sportshylar da bar. Atap aıtqanda, jasóspirimder arasyndaǵy álem jáne Azııa chempıony Nurqanat Serikbaev, Azııa chempıony Danııar Shamshaev, Grand slem jáne Gran-prı jarystarynyń jeńimpazy Islam Bozbaev, jazǵy Ýnıversıadanyń altyn medal ıegeri Ǵalymjan Qyryqbaı, áskerıler arasyndaǵy álem birinshiliginiń júldegeri Baýyrjan Narbaev, sondaı-aq qyzdar arasynda Ǵalııa Tynbaeva, Kamıla Berliqash sııaqty halyqaralyq jarystardyń jeńimpazy men júldegerleri Qazaqstan chempıony ataǵy úshin beldesip jatyr.
«Búginde dzıýdo sporty elimizde keń taraǵan, jankúıerleri kóp sport túrleriniń biri. Jerlesterimiz halyqaralyq jarystarda, álem jáne Azııa chempıonattarynda, tórt jyldyqtyń basty jarysy – Olımpıadada el qorjynyna únemi júlde salyp júr. Nátıjesinde álem dzıýdoshylary bizdiń balýandarmen sanasatyndaı jaǵdaıǵa jetti. Búgin elordada alaýy jaǵylǵan ishki chempıonatta shyn myqty sportshy jeńiske jetip, aldaǵy ýaqytta el namysyn abyroımen qorǵaýǵa tıis. Qazaqstan birinshiligine qatysyp jatqan barlyq dzıýdoshyǵa sáttilik tileımin», - dedi Týrızm jáne sport mınıstri Ermek Marjyqpaev.
Tórt kúnge josparlanǵan jarysta erler men áıelder 7 salmaq dárejesinde ózara myqtyny anyqtaıdy. Condaı-aq aralas komandalyq jarystyń jeńimpazyna Qazaqstan kýbogi tabystalady. El chempıonatynyń qorytyndysy boıynsha 2024-2025 jylǵy jańa maýsymǵa ulttyq qurama jasaqtalady.
