Astanada dzıýdodan áskerı qyzmetshiler arasyndaǵy álem chempıonaty bastalady
ASTANA. 1 shilde. QazAqparat - Búgin Astanadaǵy «Dáýlet» sport kesheniniń bazasynda dzıýdodan áskerı qyzmetshiler arasyndaǵy 35-álem chempıonaty bastaldy.
Chempıonat 1-5 shilde aralyǵynda QR QM Armııa ortalyq sport klýbynyń uıymdastyrýymen Búkilálemdik armııa sporty keńesiniń jáne Qazaqstan dzıýdo federatsııasynyń qoldaýymen ótedi. Sharaǵa qatysý úshin 28 elden 300-ge tarta sportshy kelgen.
Uıymdastyrýshylardyń aıtýynsha, Qazaqstandyq armııashylar quramasynda elimizdiń osy sport túrindegi birqatar myqty sportshylary bar. Máselen, 2011 jylǵy 5-búkilarmııalyq oıyndardyń qola júldegeri, kishi serjant Ten Alına, 2013 jylǵy jastar arasyndaǵy álem kýbogynyń ıegeri, qatardaǵy jaýynger Baımahanbetov Meıirlan, 2013 jylǵy Azııa chempıonatynyń qola júldegeri, TMD-ǵa qatysýshy memleketter dostas armııalarynyń ІH spartakıadasynyń jeńimpazy Jumaqan Eldos, 2011 jylǵy álem kýbogynyń júldegeri, Qazaqstannyń eki dúrkin chempıony, kishi serjant Faızolanova Zámzágúl jáne basqa da sportshylar bar.
Chempıonattyń alǵashqy kúni ashylý rásimi jáne komandalyq jarystar, odan keıingi kúnderi 60, 66, 73, 81, 90, 100 kg deıingi jáne 100 kg joǵary salmaq dárejeleri boıynsha jeke saıystar ótedi.
Aıta ketý kerek, Qazaqstan áskerı qyzmetshiler arasyndaǵy dzıýdodan álem chempıonatyn TMD elderi ishinde tuńǵysh ret ótkizip otyrǵan memleket. Chempıonattyń ashylý rásimine Qorǵanys mınıstri Ádilbek Jaqsybekov qatysyp, sportshylarǵa aq jol tiledi.
