Astanada dzıýdodan álemdik Qazaqstan Barysy Grand Slam týrnıri ótedi

ASTANA. KAZINFORM — Elordada 9 mamyr kúni dzıýdodan álemdik reıtıngilik Qazaqstan Barysy Grand Slam týrnıri bastalady. 

Úsh kúnge sozylatyn baıraqty dodany elimiz bıyl úshinshi ret uıymdastyrǵaly otyr. 

Qazaqstan dzıýdo federatsııasynyń baspasóz qyzmetinen málim etkenindeı, álemniń kil myqtylaryn jınaıtyn bul báseke Jaqsylyq Úshkempirov atyndaǵy jekpe-jek saraıynda ótedi. 

Atalmysh jarys nátıjesinde IJF erejelerine sáıkes jarystyń jeńimpazdary men júldegerleri arasynda álemdik jáne olımpıadalyq reıtıngilerde upaılar bólinedi. Atap aıtqanda, І oryn úshin – 1 myń, kúmis júldegerge – 700, al qola medal alǵanǵa 500 upaı esepteledi. 

Qazaqstan dzıýdo federatsııasy men Halyqaralyq dzıýdo federatsııasynyń (IJF) ekijaqty kelisimshartyna sáıkes Qazaqstan álemdik Grand Slam jarysyn 2026 jylǵa deıin qabyldaıdy. 

Qazaqstan Barysy Grand Slam álemdik jarysy Qazsport telearnasynan tikeleı efırde kórsetiledi.

Jarys baǵdarlamasy:

9 mamyr

Áıelder: -48 kg, -52 kg, -57 kg.

Erler: -60 kg, -66 kg.

10 mamyr

Áıelder: -63 kg, -70 kg.

Erler: -73 kg, -81 kg.

11 mamyr

Áıelder: -78 kg, +78 kg.

Erler: -90 kg, -100 kg, +100 kg.

Eske sala keteıik, budan buryn Móldir Jańbyrbaıdyń karateden Mysyrdaǵy týrnırdiń chempıony atanǵanyn jazǵan edik.