Astanada dzıýdodan álem birinshiligi bastaldy
ASTANA. QazAqparat - Búgin Astanada dzıýdodan álem birinshiligi bastaldy. Bul shara elimizde alǵash ret ótkizilip otyr.
Dúbirli dodaǵa álemniń 120-dan astam memleketinen 1 myńǵa jýyq sport sańlaqtary qatysýda.
Tańǵy saǵat 11.00-de bastalǵan kúres básekesin «Qazsport» telearnasy tikeleı efırde kórsetýde. Búgin 60 keli salmaqtaǵy erler men 48 kelidegi qyzdar tatamıge shyǵýda. Jeńimpazdar tústen keıin anyqtalatyn bolady.
Aıta ketý kerek, 60 keli salmaqta Eldos Smetov pen Rýstam Ybyraev el namysyn qorǵaýda. Olar irikteý kezdesýlerin sátti bastady.
Búgin saǵat 16-00-de Álem chempıonatynyń saltanatty ashylý rásimi bolady. Álem birinshiligi «Alaý» sport kesheninde ótip jatyr.
