Astanada djıý-djıtsýdyń damýyna zor úlesin qosqan sportshylar marapattaldy
ASTANA.QazAqparat - Astana qalasynda elimizdegi djıý-djıtsýdyń damýyna úles qosqan sport sańlaqtaryna «Astana Jiu-Jitsu Awards-2017» (AЈЈA) syılyǵy tabystaldy, dep habarlaıdy «QazAqparat» HAA tilshisi.
«Astana Jiu-Jitsu Awards-2017» (AЈЈA) syılyǵy bes nomınatsııa boıynsha taǵaıyndaldy. Atap aıtqanda, «Erler arasynda úzdik kompetıtor» nomınatsııasy qyzyl kúreń belbeýdiń ıegeri, halyqaralyq týrnırlerdiń birneshe dúrkin chempıony Mansur Habıbýllaǵa tabys etildi. Al «Áıelder arasynda úzdik kompetıtor» retinde Ashhabad qalasynda ótken Azııa oıyndarynyń qola júldegeri, qyzdardyń arasynda Qazaqstandaǵy tuńǵysh qyzyl kúreń belbeýdiń ıegeri, sport sheberi Nına Kım tanyldy.
«Jyl jańalyǵy» nomınatsııasy AJJA syılyǵynyń laýreaty bolyp Ashhabad qalasynda ótken Azııa oıyndarynyń qola júldegeri, Dýbaıdaǵy týrnırdiń altyn medal ıegeri, Qazaqstan chempıony, halyqaralyq týrnırlerdiń birneshe dúrkin jeńimpazy, sport sheberi Galına Dývanovaǵa buıyrdy. Jas sportshylardy jattyqtyryp júrgen belgili bapker, qyzyl kúreń belbeýdiń ıegeri Damır Karıev «Jyl bapkeri» atandy. Al 2017 jyly ózge óńirlerden góri joǵary kórsetkishteri úshin «Alliance» akademııasynyń fılıaly bolyp Jarkent qalasyndaǵy ókildik tanyldy.
«Djıý-djıtsý -bul ómir salty. Sporttaǵy daryndylyq 1 ǵana paıyz dep eseptesek, 99 paıyz jattyǵýǵa berilmeseń eshqandaı belesterdi baǵyndyra almaısyń. Sondyqtan, djıý-djıtsýda eń basty qarsylasym - ol ózim ekenin jaqsy bilemin. Aldaǵy ýaqytta bıik asýlardy baǵyndyrý úshin barymdy salamyn», - deıdi «Jyl jańalyǵy» nomınatsııasyn alǵan Galına Dývanova.
Úzdik sportshylardy Olımpıada chempıony, Parlament Májilisiniń depýtaty Serik Sápıev pen onyń áriptesi Shaımardan Nurymov, djıý-djıtsýdan álem chempıony Armanjan Rýzahýnov tabystady.
