Astanada djıp kóligin urlap kelgen qylmystyq top quryqtaldy
ASTANA. QazAqparat - Astana polıtseıleri qymbat kólikterdi urlaıtyn qylmystyq topty tutqyndady, dep habarlaıdy «QazAqparat» HAA tilshisi.
Elordalyq ІІD baspasóz qyzmeti habarlaǵandaı, 23 naýryz kúni túnde belgisiz bireýler 187 kóshesindegi turǵyn úıdiń aýlasynan «Toyota Land Crusier 200» avtomashınasyn urlap áketken. Kúdikti retinde Pavlodar men Qostanaı oblysynyń jáne Reseı Federatsııasynyń azamattary ustaldy.
ІІD bastyǵy, polıtsııa general-maıory Amantaı Áýbákirovtyń aıtýynsha, «jedel qyzmetkerler qala aýmaǵynda birneshe ret qymbat mashınalardy urlaǵan, quramyna tórt adam kiretin qylmystyq topty tutqyndady». Kúdiktilerdiń ýaqytsha turatyn jerin tintý barysynda kólik quraldaryn urlaýǵa arnalǵan jabdyqtar men quraldar tabylǵan.
Sondaı-aq, K.Baıseıitova kóshesindegi kólik turaǵynan jáne M.Dýlatov kóshesindegi konteınerden buryn urlanǵan eki kólik («Toyota Land Crusier 200» jáne «Toyota-RAV4») tabyldy.
Qazirgi tańda QR QK «Urlyq jasaý» baby boıynsha sotqa deıingi tergeý jumystary júrgizilýde. Tutqyndalýshylar Astana qalalyq ІІD ÝQO-ǵa qamaldy.
