Astanada Djeı Lonyń kontsertinde tártip buzǵan áıelge qatysty qylmystyq is qozǵaldy
ASTANA. KAZINFORM — Djennıfer Lopestiń Astanada ótken kontsertinde qoǵamdyq tártipti buzǵan áıelge qatysty qylmystyq is qozǵaldy. Bul týraly elordalyq polıtsııa departamentiniń baspasóz qyzmeti málim etti.
Áleýmettik jelilerde kontsert kezinde túsirilgen beınejazba tarady. Onda polıtseıler bir áıeldi oqıǵa ornynan kóterip alyp ketip bara jatqany kórinedi. Keıinnen bul áıel Pavlodar oblystyq polıtsııa departamenti bastyǵynyń orynbasarynyń jary ekeni týraly aqparat paıda boldy.
Atalǵan jaıtqa qatysty Astana qalalyq polıtsııa departamenti túsinikteme berdi.
— «Astana Arenada» ótken kontsert barysynda qoǵamdyq tártipti buzǵan áıelge qatysty oqıǵa tirkeldi. Qaqtyǵystyń ýshyǵýyna jol bermeý maqsatynda polıtsııa qyzmetkerleri ony is-shara aýmaǵynan shyǵaryp jiberdi. Tekserý nátıjesinde atalǵan fakti boıynsha qylmystyq is qozǵaldy.
Qosymsha aıta ketsek, bul áıel ishki ister organy qyzmetkeriniń jubaıy bolyp tabylady. Bul onyń áreketine quqyqtyq baǵa berýge eshqandaı áser etpeıdi. Kerisinshe, bul jaǵdaıda qoǵam aldyndaǵy jeke jaýapkershilik arta túsedi, — delingen Astana PD habarlamasynda.
Polıtsııa ókilderi zań aldynda barsha azamattyń teń ekenin, quqyq qorǵaý organdary qyzmetkeriniń otbasyna tıesili bolý qandaı da bir artyqshylyq bermeıtinin atap ótti.
Al Pavlodar oblystyq PD bul máselege qatysty pikir bildirýden bas tartyp, istiń Astanada qaralyp jatqanyn alǵa tartty.
Eske sala keteıik, buǵan deıin Astanada ótken Djennıfer Lopestiń kontserti týraly materıal jarııalanǵan bolatyn.
